12 naýryzdan bastap Qazaqstanda Ákimshilik quqyq buzýshylyq týraly kodekske engizilgen ózgerister kúshine enedi. Túzetýler jol qozǵalysy erejelerin avtomatty túrde baqylaý aiasyn keńeitýdi kózdeidi, dep habarlaidy Dalanews.kz.
Bul rette jańa shekteýler engizilmeidi. Kameralar tek qoldanystaǵy talaptardy tirkeýdi kúsheitedi.
Jańashyldyqqa sáikes, beinebaqylaý júieleri endi júrgizýshiniń rólde otyryp telefon qoldanǵanyn jáne qaýipsizdik beldigin taqpaǵanyn anyqtai alady. Sonymen qatar júie memlekettik derekqorlarmen bailanysý arqyly kólikte mindetti saqtandyrýdyń bar-joǵyn jáne tehnikalyq baiqaýdyń merzimin de teksermek.
Budan bólek, keibir ákimshilik baptar boiynsha (máselen, jolda keptelis týdyrý nemese jaryq shamdaryn talapqa sai qospaý) júie inspektordyń qatysýynsyz avtomatty túrde eskertý shyǵarýǵa múmkindik alady.
Al jaiaý júrginshilerge kamera arqyly aiyppul salynady degen aqparat shyndyqqa sáikes kelmeidi. Ishki ister ministrligi mundai málimetterdiń jalǵan ekenin resmi túrde málimdedi.
