11 jasar bala sábidi ólimnen arashalap qaldy
«2019 jyldyń 2 sáýir kúni saǵat 19:40 shamasynda Túrkistan oblysy, Jetisai aýdany, Jetisai qalasy A.Qalybekov kóshesinde oinap júrgen balalar №57 turǵyn úidiń syrtynda ornalasqan jeke úidiń káriz júiesiniń shuńqyrynan kishkentai búldirshinniń qulap túskenin baiqap qalǵan. Artynsha júgirip kelgen balalarǵa qudyqtyń ishindegi 1 metrden asa las sýdan kishkentai búldirshin kórinbegen. Osy mezette 2008 jyly týǵan 5-synyp oqýshysy Beknazar Meirambek esh oilanbastan, dereý qudyqtyń ishine túsedi. Las sý moiyn tusyna kelgenine qaramastan, sýǵa tunshyǵyp jatqan 2017 jyly týǵan 2 jasar Baqytbek Sabyrjandy kóterip alyp, shuńqyrdan shyǵarǵan», – dedi departament bastyǵy.
Jas búldirshin S.Baqytbek aýrýhanaǵa jetkizilip, qazirgi tańda onyń densaýlyǵy birqalypty, em qabyldaýda. Osylaisha 11 jasar Beknazar Meirambek óziniń batyldyǵyn, qaisarlyǵyn kórsetip, jas búldirshinniń ómirin saqtap, óz isimen erlik kórsetti.
Qutqarýshy Beknazar Musauly Jetisai qalasyndaǵy №2 Shoqan Ýálihanov mektebiniń 5 «a» synyp oqýshysy. Jas batyr baspasóz máslihatynda Tótenshe jaǵdailar departamentiniń arnaiy gramotamasymen jáne syilyqpen marapattaldy.
Túrkistan oblysy ákiminiń baspasóz qyzmeti
