Jaqynda «Qazaqstan» Ulttyq telearnasyndaǵy «1-stýdiia» saiasi tok-shoýynda Arman Shoraev, belgili jýrnalist Ermurat Bapi, jýrnalist, qoǵam belsendisi – Arman Sqabyluly jáne jýrnalist, zańger Dina Elgezekter qazirgi qazaq jýrnalistikasyna qatysty óz oilaryn ortaǵa saldy. Dál osy osy tok-shoýda kóterilgen máselege qatysty belgili jýrnalist, «Egemen Qazaqstan» gazetiniń Ońtústik Qazaqstan oblysyndaǵy menshikti tilshisi Ǵalymjan Elshibai óziniń Feisbýktaǵy paraqshasynda pikir bildirdi.
Shirek ǵasyrdan beri jýrnalistikanyń "otymen kirip kúlimen shyǵyp" júrip jinaqtaǵan ári aýdandyq gazettiń korrektorlyǵynan bastap qalalyq, oblystyq basylymda, respýblikalyq jekemenshik jáne memlekettik aqparat quralynda jumys istep kele jatqan tájiribeme súiene otyryp birden aitsam búgingi baspasózdiń "bas aýrýyna" ainalǵan tok shoý kóńilimnen shyqqan joq.
Nege? Birinshiden, taqyryp ashylǵan joq. Bolmasa taqyrypty tym aýqymdy etip aiqailatyp qoimai "Telearnadaǵy jolbike júrgizýshiler qaidan paida boldy?" dep sheńberdi qysqalaý syzý kerek edi. Ábden jaýyr bolǵan taqyryp bul tok-shoýdyń da altyn ýaqytynyń kóp bóligin alyp taǵy shiyrlai tústi.
Ekinshiden, spikerler durys tańdalmaǵan. Tórteýdiń úsheýi telearnada ter tókkender, bireýi ǵana gazetti jaqsy biledi. Jýrnalistikanyń bastaýy gazetten bastalady desek te "buryn shyqqan murttan keiin shyqqan saqal ozǵan" zamanda telearnanyń tegeýrini, yqpaly qanshalyqty zor degenmen qazirginiń tuz kóziri-aqparattyq portaldyń jelkenin kerip eskegin esken bir adam osy talqylaýdyń bel ortasynda bilek sybanýy kerek edi.
Úshinshiden, jýrnalistika fakýltetin ashý, jabý máselesi "maishammen" talqylanǵan tusta osy mamandyqqa jaqsyly-jamandy shákirt daiarlaýǵa atsalyp júrgen bir ustaz mindetti túrde qatysýy qajet bolatyn. Búginde kóldeneńnen qosylǵan kók attylar ár salada da az emestigin eskersek onda ádildik úshin oqý oryndaryndaǵy barlyq mamandyqqa tusaý salýǵa tiispiz, al Arman Shoraevtyń jýrnalistika fakýltetin jabý týraly oiy sýda malti almaityn adamǵa júzýdi úiretýdiń ornyna tóbesinen basyp tunshyqtyra túsý bolyp shyqpai ma?
Tórtinshiden, bul joly aitylǵan ótkir pikirler durys shyǵar, biraq aqparat salasynda oń ózgerister baryn da múldem joqqa shyǵarmai nelikten jýrnalister arqyly eldiń, qoǵamnyń damýyna qosyp júrgen jaqsy jaqtar, jańasha bastamalar tarazyǵa tartylmady? Basqalardyń topyraq shashyp júrgeni azdai olarmen jarysyp "óz kórimizdi ózimiz qosyla qazǵannan" ne utamyz?
Besinshiden, ózimizben aralas-quralas júrgen áriptesimiz-dosymyz Berik Ýáli basqalaryn aitpaimyn dál osy jolǵy tok shoýda tikelei ózine qabyrǵasynan qoiylǵan naqty suraqtarǵa jaýap bere alǵan joq. Búitip Qojanasyr siiaqty ózi otyrǵan "butaqty keskenshe" durysy "kótere almas shoqpardy belge bailamaý"..."Platon meniń dosym, biraq aqiqat odan qymbat" degen osyndaida aitylsa kerek sirá!
Altynshydan, telearna tizginin ustaǵan Erlan Qarindi jańadan Amerika ashqan adamǵa teńeý asyra silteý siiaqty. Ulttyq arna Sherxan Murtaza, Ǵalym Dosken basqarǵan jyldary dańqy qalai dúrkiregenin el umyta qoiǵan joq, umytpaidy da. Áriptester Pozner-Pozner dep aýyzdarynyń sýy quryǵansha mysal úshin taǵy eki-úsh adamdy aitsaq, aldyńǵy býynnan Nurtileý Imanǵaliulynyń, keiingi býynnan Qasym Amanjoldyń qalai telesuqbat quratynyn talai jastar jyr qylyp aitatynyn shynymen estimei júr me?
Jetinshiden... Osylai aita tússek bul taqyrypqa qatysty on saýsaqty da búgip turyp oi aita berýge bolady. Bul joly osymen shekteleiin. Árine, jurt jabyla maqtaýǵa kóshkende qarsy pikir qozǵasam óz sózim ózimdiki. Aqiqat pikirtalastan týady.
Ǵalymjan Elshibai, jýrnalist
Derekkózi:
