Almatyda júrgizilip jatqan qurylys-montaj jumystary jańa oqý jyly bastalǵanǵa deiin tolyq aiaqtalmaidy. Osyǵan bailanysty qala politsiiasy jol qozǵalysyn retteý úshin qosymsha sharalar qabyldamaq, dep habarlaidy dalanews.kz.
Bul týraly Almaty qalasy PD Qoǵamdyq qaýipsizdik basqarmasynyń bastyǵy Timýr Noǵaibaev málimdedi.
Onyń aitýynsha, 1 qyrkúiek qarsańynda qala kóshelerindegi kólik júktemesi aitarlyqtai artady.
– Júkteme óte joǵary bolady. Jol qozǵalysy qaýipsizdigin qamtamasyz etý úshin problemaly qiylystarǵa jaiaý patrýlder qoiylady. Sonymen qatar patrýldik politsiia jasaqtary kúsheitilgen rejimde jumys istep, qalaǵa kireberisterde de kezekshilik atqarady, – dedi ol.
Noǵaibaevtyń sózinshe, qazirgi ýaqytta baǵdarshamdardyń jumys rejimin qaita baptaý josparlanyp otyrǵan joq. Alaida kólik keptelisi týraly signaldar tússe, kezekshi bólimniń qyzmetkerleri beinebaqylaý júieleri arqyly jaǵdaidy baqylap, jekelegen qiylystardaǵy kólik aǵynyn retteý sharalaryn qabyldaidy.
Politsiia ókilderi jańa oqý jyly bastalar aldynda júrgizýshilerge joldaǵy ýaqytsha shekteýler men qurylys jumystaryna bailanysty baǵyttaryn aldyn ala josparlaýǵa keńes berdi.
