1 qazanda Kollektorlyq agenttikterdiń jeke tulǵalardyń bereshegin retteý qaǵidalary kúshine enedi, dep habarlaidy Dalanews.kz.
Bul qaǵidalar "Qazaqstan Respýblikasynyń keibir zańnamalyq aktilerine kredit berý kezinde táýekelderdi barynsha azaitý, qaryz alýshylardyń quqyqtaryn qorǵaý, qarjy naryǵyn retteýdi jáne atqarýshylyq is júrgizýdi jetildirý máseleleri boiynsha ózgerister men tolyqtyrýlar engizý týraly" 2024 jylǵy 19 maýsymdaǵy QR Zańyn iske asyrý úshin ázirlengen, dep naqtylaidy QR Qarjy naryǵyn retteý jáne damytý agenttiginiń baspasóz qyzmeti.
Jańa qaǵidalarǵa sáikes, kollektorlyq agenttik banktik qaryz sharty nemese mikrokredit berý týraly shart boiynsha quqyqtardy (talaptardy) satyp alǵan sátten bastap 30 kún ishinde boryshkerge onyń mindettemeni oryndaý talaptaryn ózgertýge ótinish berý quqyǵy týraly habarlaýǵa mindetti bolady.
Azamattardyń 2024 jylǵy 1 qazanǵa deiin satyp alynǵan bereshegi boiynsha kollektorlyq agenttikter bereshekti retteý rásimin ótkizý týraly mindet engizilgen sátten bastap 20 kún ishinde (aǵymdaǵy jylǵy 1 qazan) óz boryshkerlerin mindettemeni oryndaý talaptaryn ózgertý týraly tiisti ótinish berý quqyǵy týraly habardar etýge mindetti bolady.
Boryshker habarlamany alǵannan keiin kez kelgen ýaqytta mindettemelerdi oryndamaý sebebin, sondai-aq bereshekti retteýdiń óz nusqalaryn kórsete otyryp, kollektorlyq agenttikke tiisti ótinishpen júginýge quqyly. Ótinishke mindetti túrde kiristerdiń tómendegenin jáne óz mindettemelerin oryndai almaityndyǵyn kýálandyratyn rastaityn qujattar qosa berilýi kerek.
Eger boryshker málimetter men qujattardy tolyq kólemde ótkizbese, onda kollektorlyq agenttik 10 jumys kúni ishinde qosymsha málimetterdi suratady, bul rette boryshkerdiń olardy usyný merzimin 5 jumys kúni dep kórsetedi. Qujattardy tiisti merzimde usynbaý – boryshkerdiń ótinishin qaraýsyz qaldyrý úshin negiz.
Tolyq qujattar toptamasyn usynǵannan keiin kollektorlyq agenttik ótinishti kúntizbelik 15 kún ishinde qaraidy jáne mynalar týraly:
- qaryz alýshy usynǵan mindettemelerdi oryndaýdyń talaptaryna ózgeristermen kelisetini;
- mindettemelerdi oryndaý talaptaryn ózgertý boiynsha qarsy usynysy;
- bas tartý sebepteriniń ýájdi negizdemesin kórsete otyryp, mindettemeni oryndaý talaptaryn ózgertýden bas tartatyny týraly jaýapty usynady.
Sheshim qabyldaý kezinde kollektorlyq agenttik boryshkerler sanaty (mysaly, resmi jumyssyz, halyqtyń áleýmettik osal toptarynyń ókilderi), qajetti qujattar tizbesi jáne borysh júktemesin azaitý jónindegi sharalar aiqyndalatyn ishki qujattardy basshylyqqa alady. Bul aqparat kollektorlyq agenttiktiń resmi internet-resýrsynda ornalastyrylýǵa tiis.
Sondai-aq qaǵidalar kollektorlyq agenttiktiń jaqsartý jaǵyna qarai birjaqty tártippen mindettemelerdi oryndaý talaptaryn ózgertý quqyǵyn kózdeidi. Bul talaptar aiyppuldardy, ósimpuldardy jáne komissiialardy azaitýdy nemese olardyń kúshin joiýdy, boryshty jáne paiyzdardy tolyǵymen nemese ishinara keshirýdi, negizgi borysh pen paiyzdar boiynsha tólemderdi keiinge qaldyrýdy nemese bólip tóleýdi qamti alady.
Jaqsartý talaptaryn qoldaný kezinde kollektorlyq agenttik bul týraly boryshkerge habarlaýǵa mindetti. Kelispegen jaǵdaida boryshker habarlamany alǵan kúnnen keiin 14 kún ishinde agenttikke ótinish jibere otyryp, bas tartýǵa quqyly ekeni de naqtylanady.
