1 قازاندا كوللەكتورلىق اگەنتتىكتەردىڭ جەكە تۇلعالاردىڭ بەرەشەگىن رەتتەۋ قاعيدالارى كۇشىنە ەنەدى، دەپ حابارلايدى Dalanews.kz.
بۇل قاعيدالار "قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى بارىنشا ازايتۋ، قارىز الۋشىلاردىڭ قۇقىقتارىن قورعاۋ، قارجى نارىعىن رەتتەۋدى جانە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" 2024 جىلعى 19 ماۋسىمداعى ق ر زاڭىن ىسكە اسىرۋ ءۇشىن ازىرلەنگەن، دەپ ناقتىلايدى ق ر قارجى نارىعىن رەتتەۋ جانە دامىتۋ اگەنتتىگىنىڭ باسپا ءسوز قىزمەتى.
جاڭا قاعيدالارعا سايكەس، كوللەكتورلىق اگەنتتىك بانكتىك قارىز شارتى نەمەسە ميكروكرەديت بەرۋ تۋرالى شارت بويىنشا قۇقىقتاردى (تالاپتاردى) ساتىپ العان ساتتەن باستاپ 30 كۇن ىشىندە بورىشكەرگە ونىڭ مىندەتتەمەنى ورىنداۋ تالاپتارىن وزگەرتۋگە ءوتىنىش بەرۋ قۇقىعى تۋرالى حابارلاۋعا مىندەتتى بولادى.
ازاماتتاردىڭ 2024 جىلعى 1 قازانعا دەيىن ساتىپ الىنعان بەرەشەگى بويىنشا كوللەكتورلىق اگەنتتىكتەر بەرەشەكتى رەتتەۋ ءراسىمىن وتكىزۋ تۋرالى مىندەت ەنگىزىلگەن ساتتەن باستاپ 20 كۇن ىشىندە (اعىمداعى جىلعى 1 قازان) ءوز بورىشكەرلەرىن مىندەتتەمەنى ورىنداۋ تالاپتارىن وزگەرتۋ تۋرالى ءتيىستى ءوتىنىش بەرۋ قۇقىعى تۋرالى حاباردار ەتۋگە مىندەتتى بولادى.
بورىشكەر حابارلامانى العاننان كەيىن كەز كەلگەن ۋاقىتتا مىندەتتەمەلەردى ورىنداماۋ سەبەبىن، سونداي-اق بەرەشەكتى رەتتەۋدىڭ ءوز نۇسقالارىن كورسەتە وتىرىپ، كوللەكتورلىق اگەنتتىككە ءتيىستى وتىنىشپەن جۇگىنۋگە قۇقىلى. وتىنىشكە مىندەتتى تۇردە كىرىستەردىڭ تومەندەگەنىن جانە ءوز مىندەتتەمەلەرىن ورىنداي المايتىندىعىن كۋالاندىراتىن راستايتىن قۇجاتتار قوسا بەرىلۋى كەرەك.
ەگەر بورىشكەر مالىمەتتەر مەن قۇجاتتاردى تولىق كولەمدە وتكىزبەسە، وندا كوللەكتورلىق اگەنتتىك 10 جۇمىس كۇنى ىشىندە قوسىمشا مالىمەتتەردى سۇراتادى، بۇل رەتتە بورىشكەردىڭ ولاردى ۇسىنۋ مەرزىمىن 5 جۇمىس كۇنى دەپ كورسەتەدى. قۇجاتتاردى ءتيىستى مەرزىمدە ۇسىنباۋ – بورىشكەردىڭ ءوتىنىشىن قاراۋسىز قالدىرۋ ءۇشىن نەگىز.
تولىق قۇجاتتار توپتاماسىن ۇسىنعاننان كەيىن كوللەكتورلىق اگەنتتىك ءوتىنىشتى كۇنتىزبەلىك 15 كۇن ىشىندە قارايدى جانە مىنالار تۋرالى:
- قارىز الۋشى ۇسىنعان مىندەتتەمەلەردى ورىنداۋدىڭ تالاپتارىنا وزگەرىستەرمەن كەلىسەتىنى؛
- مىندەتتەمەلەردى ورىنداۋ تالاپتارىن وزگەرتۋ بويىنشا قارسى ۇسىنىسى؛
- باس تارتۋ سەبەپتەرىنىڭ ءۋاجدى نەگىزدەمەسىن كورسەتە وتىرىپ، مىندەتتەمەنى ورىنداۋ تالاپتارىن وزگەرتۋدەن باس تارتاتىنى تۋرالى جاۋاپتى ۇسىنادى.
شەشىم قابىلداۋ كەزىندە كوللەكتورلىق اگەنتتىك بورىشكەرلەر ساناتى (مىسالى، رەسمي جۇمىسسىز، حالىقتىڭ الەۋمەتتىك وسال توپتارىنىڭ وكىلدەرى)، قاجەتتى قۇجاتتار تىزبەسى جانە بورىش جۇكتەمەسىن ازايتۋ جونىندەگى شارالار ايقىندالاتىن ىشكى قۇجاتتاردى باسشىلىققا الادى. بۇل اقپارات كوللەكتورلىق اگەنتتىكتىڭ رەسمي ينتەرنەت-رەسۋرسىندا ورنالاستىرىلۋعا ءتيىس.
سونداي-اق قاعيدالار كوللەكتورلىق اگەنتتىكتىڭ جاقسارتۋ جاعىنا قاراي ءبىرجاقتى تارتىپپەن مىندەتتەمەلەردى ورىنداۋ تالاپتارىن وزگەرتۋ قۇقىعىن كوزدەيدى. بۇل تالاپتار ايىپپۇلداردى، ءوسىمپۇلداردى جانە كوميسسيالاردى ازايتۋدى نەمەسە ولاردىڭ كۇشىن جويۋدى، بورىشتى جانە پايىزداردى تولىعىمەن نەمەسە ءىشىنارا كەشىرۋدى، نەگىزگى بورىش پەن پايىزدار بويىنشا تولەمدەردى كەيىنگە قالدىرۋدى نەمەسە ءبولىپ تولەۋدى قامتي الادى.
جاقسارتۋ تالاپتارىن قولدانۋ كەزىندە كوللەكتورلىق اگەنتتىك بۇل تۋرالى بورىشكەرگە حابارلاۋعا مىندەتتى. كەلىسپەگەن جاعدايدا بورىشكەر حابارلامانى العان كۇننەن كەيىن 14 كۇن ىشىندە اگەنتتىككە ءوتىنىش جىبەرە وتىرىپ، باس تارتۋعا قۇقىلى ەكەنى دە ناقتىلانادى.
