Astanada sýburqaq qurylysyna bólingen 1 mlrd teńgeni jymqyrdy dep kúdikke ilingen mádeniet basqarmasynyń eks-basshysy Bolat Majaǵulov on jylǵa sottalýy múmkin, dep habarlaidy Dalanews.kz.
Tengrinews.kz málimetinshe, memlekettik aiyptaýshy Azamat Toqtarbai Bolat Majaǵulov pen Mádi Qanapinge jaza taǵaiyndaýdy surady.
- Bolat Majaǵulovty QR Qylmystyq kodeksiniń 189-babynyń 4-bóligi 2-tarmaǵy (“Ózine senip tapsyrylǵan bóten múlikti iemdený nemese ysyrap etý, asa iri mólsherde”) boiynsha qylmystyq quqyq buzýshylyq jasaǵany úshin kináli dep tanyp, oǵan 10 jyl bas bostandyǵynan aiyrý jazasyn taǵaiyndaýdy jáne ómir boiyna memlekettik qyzmette laýazymdy qyzmetter atqarý quqyǵynan aiyrýdy suraimyn, – dep málimdedi prokýror.
Sondai-aq, memlekettik aiyptaýshy injener Mádi Qanapindi QR Qylmystyq kodeksiniń 28-babynyń 5-bóligi (“Kómektesýshilik”) jáne 189-babynyń 4-bóligi 2-tarmaǵy boiynsha kináli dep tanyp, 7 jylǵa bas bostandyǵyn shekteýdi jáne ómir boiyna memlekettik qyzmette laýazymdy qyzmetter atqarý quqyǵynan aiyrýdy surady.
Eske salaiyq, eks-sheneýnik Bolat Majaǵulovtyń ustalǵany týraly Qarjylyq monitoring agenttigi málim etti. Astana qalasynyń "Mádeniet basqarmasy" MM-niń burynǵy basshysy men merdiger uiym ókilderine qatysty asa iri kólemde biýdjet qarajatyn jymqyrý faktisi boiynsha Qarjylyq monitoring agenttigi sotqa deiingi tergeý amaldaryn júrgizdi.
2016 jyly Astana kúni merekesine orai salynǵan "Kún" ("Esil ózenindegi jaryq-illiýminatsiialyq jáne ot shoýy") sýbyrqaǵynyń qurylysy kezinde memlekettik satyp alý rásimderi júrgizilmei tikelei kelisimsharttar jasalǵan. Sýburqaq jobalyq qujattamasyz jáne memlekettik saraptamadan ótpei salynǵan.
Qurylys barysynda tehnikalyq sipattamalarǵa sáikes kelmeitin sapasyz materialdar qoldanylǵan. Nátijesinde atalǵan nysan 2017 jyldan bastap jumys istemei, qazirgi tańda apatty jaǵdaida tur.
Urlanǵan qarajattyń kólemi 1 mlrd teńgeden asyp otyr.
Kúdikti, Astana qalasynyń "Mádeniet basqarmasy" MM-niń burynǵy basshysy Bolat Majaǵulov ustalyp, ýaqytsha ustaý izoliatoryna qamaldy. Tergeý aiasynda onyń múlkine tyiym salyndy. Onyń ishinde 3 kommertsiialyq nysan, 2 avtoturaq orny jáne Astana qalasyndaǵy premiým sanattaǵy páter.
Atalǵan is boiynsha kúdiktilerdiń múlkine jalpy somasy 572 million teńgeden astam somaǵa shekteý qoiyldy. QR QPK 201-babyna sáikes, sotqa deiingi tergep-tekserý derekteri jariia etýge jatpaidy.
