Eger bizde saýdalanatyn qymbat valúta evro men AQSH dollary deseńizder, qatty jańylysasyzdar. Álemdegi eń qymbat valúta – kýveıt dınary, negizi. QR Ulttyq banktiń búginge, 16 qańtarda bekitken resmı baǵamy boıynsha 1 kýveıt dınarynyń quny 1717,13 teńge bolyp tabylady, dep jazady Dalanews.kz.
Qazirgi saýdadaǵy baǵam, tipti 1721 teńgeden asty. Qazaqstan valúta naryǵyndaǵy kýveıt dınarynyń bir aı boıǵy kúıine nazar salsaq, 16 qańtarda ol óziniń eń joǵary shegin ıgergen eken. Máselen, 2024 jyly jeltoqsan aıynyń ortasynda berekesi qashqan 1 kýveıt dınarynyń quny 1700 teńgeden 1640 teńgege deıin kúrt tómendegen. Biraq bir aptadan soń, ıaǵnı 24 jeltoqsanda basyn aqyryn tiktegen ol búginge deıin ústine tıyndap baǵa qosyp, byltyrǵy joǵary sheginen de asyp otyr.
Al kýveıt dınary munshalyqty nege qundy? Óıtkeni ol álemdegi №1 eń qundy ári jas valúta bolyp tabylady. Halqynyń árbir onynshy turǵyny mıllıoner bolyp sanalatyn Kýveıtte salyq degen múlde atymen joq. Jer kólemi kishkentaı, jer asty baılyǵy mol Kýveıt búginderi álemdi munaı ónimderimen qamsyzdandyryp, kóp tabysqa keńelýde. Joǵary damyǵan elder qataryna jatatyn Kýveıttiń ekonomıkasy ártaraptandyrylǵan. Sondyqtan onda bıznes júrgizý tıimdi ári ońtaıly. Túrli salany qamtıtyn SHOB ta jaqsy damyǵan. Jumyssyzdyq degen másele de joq. Kýveıt dınary birneshe shetel valútasyna baılanǵan, ol da onyń turaqtylyǵyn qamtamasyz etedi.
Kýveıt - OPEK-tegi basty memleketterdiń biri. Osy mańda Qazaqstanmen múddeleri túıisedi. QR SİM málimetinshe, 2023 jyly Qazaqstan men Kýveıt arasyndaǵy taýar aınalym kólemi 3,6 mln dollardy quraǵan. Al qazaqstandyq eksport kólemi 2,9 mln dollardy qamtıdy. Qazaqstan úshin Kýveıt arab álemindegi mańyzdy seriktesteriniń biri bolyp tabylady. Arab ınvestorlary elimizdiń aýylsharýashylyǵy, munaı-gaz, densaýlyq saqtaý salalaryna áli de ınvestısıa salýǵa nıetti.
