Syr óńiri óner sheberleriniń Eýropadaǵy gastroldik sapary aiasynda Liýksembýrg Uly Gertsogtiginde Qyzylorda oblystyq filarmoniiasynyń kontserti ótti. «Shanyraq Fest Luxembourg» mádeni bastamasy sheńberinde uiymdastyrylǵan keshte qazaq halqynyń bai mýzykalyq jáne folklorlyq murasy kórermen nazaryna usynyldy, dep habarlaidy dalanews.kz.
Mádeni is-shara Qazaqstan Respýblikasynyń Belgiia Koroldigi men Liýksembýrg Uly Gertsogtigindegi elshiligi, oblys ákimi Murat Nálqojaulynyń jáne ERG qoldaýymen uiymdastyryldy.
Óner sapary osydan birneshe ai buryn Nurlybek Mashbekulynyń bastamasymen josparlanyp, qarajaty sheshilgen bolatyn.
Kontsertke Liýksembýrgtiń memlekettik mekemeleriniń ókilderi, diplomatiialyq korpýs músheleri, kásipkerler, mádeniet salasynyń qyzmetkerleri, sondai-aq osy elde turatyn qazaqstandyqtar men stýdent jastar qatysty.
Keshte Qazaqstannyń Liýksembýrgtegi elshisi Roman Vasilenko quttyqtaý sóz sóilep, mádeniet pen ónerdiń halyqtardy jaqyndastyratyn mańyzdy rýhani qundylyq ekenin atap ótti. Sonymen qatar mundai bastamalar memleketter arasyndaǵy dostyq qarym-qatynasty nyǵaityp, halyqtardyń bir-biriniń tarihy men dástúrin tereńirek tanýyna yqpal etetinin jetkizdi.
Mádeniet salasynyń úzdigi Áziza Izdiqulova rejisserlik etken kontserttik baǵdarlamada Syr óńiriniń bai mýzykalyq murasy keńinen nasihattalyp, ulttyq folklor, kúi óneri men jyraýlyq dástúr kórermen nazaryna usynyldy. Ónerpazdar oryndaýyndaǵy shyǵarmalar arqyly Uly dalanyń rýhy men qazaq halqynyń mádeni ereksheligi sheteldik kórermenge keńinen tanystyryldy.
Kesh qorytyndysynda ónerpazdar «Atameken» ánin oryndap, qazaq mádeni keshiniń áserli finalyna ainaldyrdy.
