Halyk Finance Ulttyq qor men Ulttyq bank operatsiialaryna súiene otyryp, teńgeniń qysqa jáne orta merzimdi perspektivalaryna sholý jasady. Qyrkúiek aiyndaǵy teńgeniń álsireýin maýsymdyq faktorlarmen bailanystyrǵan sarapshylar qazanda úkimetke únem jasaýǵa týra keletinin aitady, al jyl sońyna deiingi teńgege shaqqandaǵy 1 AQSh dollarynyń qunyna qatysty buǵan deiingi boljamdaryn ózgerissiz qaldyrdy, dep habarlaidy Dalanews.kz.
"Qazan aiynda Ulttyq qordan 600–700 mln dollar aralyǵynda valiýta satylady dep josparlanǵan. Bul sarapshylar kútken kólemnen joǵary bolyp otyr. Mundai qadam "Samuryq-Qazynanyń" baǵaly qaǵazdaryn qarjylandyrýmen bailanysty bolýy múmkin. Jalpy, 2025 jylǵa bekitilgen transfert kólemi – 5,25 trln teńge. Onyń ishinde segiz aida 3,83 trln teńge jumsalyp úlgerdi, iaǵni aiyna orta eseppen 479 mlrd teńge paidalanylǵan. Jyl sońyna deiin 2025 jylǵy josparǵa sai bolý úshin ailyq transfert kólemin 355 mlrd teńgege deiin qysqartý qajet. Bul – 25,8% tómendeý jáne fiskaldyq yntalandyrýdyń aitarlyqtai shektelýin bildiredi. Demek, Ulttyq qordan satý úshin shyǵarylatyn valiýta kólemi de qysqarýy tiis", - deidi Halyk Finance Taldaý ortalyǵynyń sarapshysy Saltanat Igenbekova.
Onyń aitýynsha, altynmen bailanysty shaǵylystyrý praktikasy da óz jalǵasyn tabady, onyń sheńberinde IV toqsanda (1,4 trln teńge) Ulttyq Bank ai saiyn shamamen 467 mlrd teńge (shamamen 848 mln dollar) somaǵa shetel valiýtasyn satýdy josparlap otyr.
"Buǵan álemdik naryqta altyn baǵasynyń aitarlyqtai ósýinen týyndaǵan teńgelik emissiia kóleminiń artýy túrtki. 2025 jyldyń basynan bastap tolyq shyǵarylmaǵan ótimdiliktiń jinaqtalýyna bailanysty aldaǵy toqsan ishinde shetel valiýtasyn satýdy ulǵaitý josparlanýda. Bul valiýta naryǵynda qosymsha usynysty paida bolýyn týdyryp, sáikesinshe Ulttyq qordan satý úshin shyǵarylatyn valiýta kóleminiń qysqarýyna yqpal etedi jáne syrtqy kúizelister bolmasa teńgeniń turaqtylyǵyna qoldaý kórsetedi", - deidi ol.
Sondai-aq, qazaq aiynda kvazimemlekettik sektor sýbektileriniń valiýtalyq túsimniń bir bóligin mindetti satý normasy aiasynda ótken aidyń qorytyndysy boiynsha valiýtalyq túsimdi satý kólemi shamamen 378 mln AQSh dollaryn qurady. BJZQ valiýta aktivteriniń úlesi osyǵan deiingi josparǵa sáikes shamamen 40% ekenin eskere otyryp, Ulttyq Bank qyrkúiekte zeinetaqy aktivteriniń investitsiialyq portfeline AQSh dollaryn satyp alǵan joq. Qazanda da valiýta satyp alý josparlanbaidy.
"Nátijesinde, qazan aiynda Ulttyq Bank tarapynan naryqta valiýtanyń taza satylymy shamamen 1 448-1 548 mln dollardy quraidy (Ulttyq Banktiń netto- satylymyna Ulttyq qordan satý úshin shyǵarylǵan jáne altyndy satýdan túsken valiýtalar kiredi), bul 2025 jylǵy eń joǵary deńgei bolady. Buryn taza satylymnyń maksimaldy máni shilde aiynda, onda da teńge quny kúrt álsiregende 1 339 mln dollar deńgeiinde tirkelgen", dep naqtylaidy sarapshy.
Sondai-aq ol munai baǵasyna qatysty da boljamymen bólisti.
"Biz munaidyń bir barreli jaqyn bolashaqta 70 dollar shamasynda saqtalyp, eksport kólemi ótken jylmen salystyrǵanda joǵary bolady dep bajailaimyz. Bul teńge baǵamyna aitarlyqtai ózgeris ákeletin jaǵdaidy tanyta almaidy. Sondyqtan biz teńgege shaqqandaǵy 1 AQSh dollarynyń jyl sońyndaǵy baǵamy 550–560 teńge deńgeiinde bolady dep aldyńǵy boljamymyzdy ózgerissiz qaldyramyz", dep sózin túiindeidi Saltanat Igenbekova.
Buǵan deiin teńge baǵamy álsirep, Ulttyq Bank valiýta naryǵyna qatysty málimdeme jasaǵan bolatyn.
