Sársenbide qor birjasyndaǵy saýda-sattyq qorytyndysy boiynsha ulttyq valiýtaǵa shaqqandaǵy 1 AQSh dollarynyń quny 526,69 teńge deńgeiinde belgilenip, shamaly ósimdi kórsetti. Al tańerteńgi jaǵdai boiynsha baǵa 530 teńgege jaqyndady. Iri megapolistegi aqsha aiyrbas oryndarynda 1 AQSh dollary, tipti 535 teńgeden saýdalana bastady. Jalpy, jazdyń basynan bastap ulttyq valiýta shamamen 3%-ǵa nemese 15,3 teńgege álsiredi. Dollardyń bulaisha kúsh alýyna ne túrtki ekenin Dalanews.kz saitynan oqyp-bile otyryńyzdar.
"Teńgeniń álsireýine Úkimettiń kelesi jylǵa arnalǵan USD/KZT juby boiynsha bazalyq stsenariidegi boljamyn qaita qaraýy áser etken bolýy múmkin", dep esepteidi Qazaqstan qarjygerleri qaýymdastyǵy.
Sonymen qatar, qaýymdastyq ekinshi jartyjyldyqta sheteldik valiýtaǵa degen suranys dástúrli túrde biýdjet qarajatyn igerýdi jedeldetý aiasynda taǵy artatynyn eske saldy, bul ekonomikadaǵy investitsiialyq jáne tutynýshylyq suranysty yntalandyrady.
"Naryq qatysýshylary kútetin aqsha baǵamyna Úkimettiń 2026 jylǵa arnalǵan bazalyq stsenaride 1 AQSh dollarynyń qunyn 475 teńgeden 540 teńgege deiin (+13,7%) qaita qaraýy týraly aqparat qosymsha áser etýi múmkin. Bul rette munaidyń bir barreliniń boljamdy quny 75 dollardan 60 dollarǵa deiin tómendetilgen (-20%)", – dep atap ótti qaýymdastyq sarapshylary.
Buǵan deiin saitymyzda "Kúzde teńge devalvatsiiaǵa ushyraýy múmkin be? Bektenov Úkimet pozitsiiasyn ashyp aitty" degen maqala jariialanǵan bolatyn. Onda Oljas Bektenov Qazaqstanda dollar baǵamy naryqtyq faktorlar negizinde qalyptasatynyn, oǵan Ulttyq Bank aralaspaitynyn eske salady. Ol 2026 jylǵy biýdjetti qalyptastyrý kezinde Úkimet munaidyń bir barreliniń baǵasy 60 dollar bolǵanda 1 AQSh dolarynyń quny 540 teńgege bolady degen bazalyq stsenariidi negizge alatynyn aitty.
