Қаржы вице-министрі Ержан Біржанов интернетте тараған, 1 млн теңгеден асқан кез келген мобильді аударым жеке кәсіпкер ретінде тіркелуге міндеттейді деген ақпаратты жоққа шығарды. Оның айтуынша, бұл мәлімет шындыққа сәйкес келмейді, деп хабарлайды Dalanews.kz.
Вице-министрдің сөзінше, аталған ақпаратты бірқатар интернет-ресурстар таратқан, алайда ол фейк жаңалық болып шыққан.
"Кеше 1 млн теңгеден асқан аударымдар бойынша міндетті түрде ЖК тіркелу керек деген жаңалық шықты. Бұл жалған ақпарат", - деді Ержан Біржанов.
Сонымен қатар ол интернет-ресурстар мен блогерлерге жалған мәлімет таратқаны үшін заңда жауапкершілік қарастырылғанын ескертті. Вице-министрдің айтуынша, бұл жаңалық қоғамда кең талқыланып, негізсіз алаңдаушылық тудырған.
"Ақпаратты жариялар алдында мұқият тексеру қажет. Біз ресми арналарымызда дұрыс мәліметті бірнеше рет жарияладық", - деді ол.
Ержан Біржанов Қаржы министрлігі мұндай фейк жарияланымдарды бақылап отырғанын, ал жиналған материалдар құқық қорғау органдарына жолданатынын айтты. Министрлік өкілдері азаматтарды тек ресми дереккөздерге сенуге шақырды.
