Бүгін елімізде жыл сайын дәстүрлі түрде ұйымдастырылатын «KitapTime – 2024» ІІІ жалпы республикалық кітап фестивалі өтті. ҚР Мәдениет және ақпарат министрлігінің қолдауымен, ҚР Ұлттық академиялық кітапханасының бастамасымен өтіп жатқан ауқымды шараға Түркістан облыстық «Фараб» әмбебап ғылыми кітапханасы да қатысуда, – деп хабарлайды Dalanews.kz Түркістан облысы әкімінің баспасөз қызметіне сілтеме жасап.
Кітап мерекесін журналист, «Түркістан Медиа Холдинг» ЖШС басқарушы директоры Тельман Бейсен,Тарих ғылымдарының докторы, профессор, Қ.А.Ясауи атындағы ХҚТУ-дің «Теология» факультетінің деканы, Досай Кенжетайұлы және ҚР Мәдениет майталманы, Түркістан облыстық «Фараб» әмбебап ғылыми кітапханасының бұқаралық көрмелік іс-шаралар секторының меңгерушісі Пернекүл Нәлтаева ашып, көпшілікті кітап оқуға шақырды.
Кітап оқуды кеңінен насихаттау, рухани, интеллектуалдық даму жолында жастарды ынталандыру және мәдени құндылықтарымызды халыққа жеткізу мақсатында ұйымдастырылған «Ғажайып кітап әлемі» атты шара барысында арнайы кітап көрмелері және инсталляциялар жасақталып, келушілер назарына ұсынылды.
Шараның балаларға арналған бөлімі «АКА» шығармашылық орталығының өнерлі балаларының концерттік бағдарламасымен жалғасты. Өнерлі балаларға кітапхана директорының атынан арнайы алғыс хат табысталып, сыйлықтар ұсынылды.
