Мәжіліс ТМД елдері арасындағы радиациялық жағдай мониторингі туралы деректер алмасуға қатысты келісімді ратификациялады, деп хабарлайды Dala News.
Құжат 2023 жылғы 8 маусымда Сочиде жасалған. Келісімге сәйкес, ТМД-ға қатысушы мемлекеттер радиациялық жағдай туралы ақпаратпен тұрақты түрде алмасу үшін уәкілетті органдардың өзара іс-қимылын ұйымдастыруға міндеттенеді.
Сонымен қатар тараптар радиациялық жағдайдың өзгерістері туралы маңызды мәліметтерді уақытылы ұсынуға келісті. Егер радиоактивті заттардың трансшекаралық таралу қаупі немесе фактісі анықталса, мемлекеттер бұл туралы бір-біріне дереу ақпарат береді. Бұл талап үшінші мемлекеттердің аумақтарына қатысты жағдайларға да қолданылады.
Келісімге сәйкес, құзыретті органдар деректер алмасудың бірыңғай тәртібін әзірлейді. Онда:
•берілетін ақпараттың нақты тізімі;
•деректер форматтары;
•архивтеу мерзімдері;
•радиациялық жағдай параметрлері туралы мәліметтерді беру регламенті;
•уәкілетті органдардың байланыс деректері көрсетіледі.
Келісім ТМД елдері арасындағы радиациялық қауіпсіздік саласындағы ынтымақтастықты күшейтуге бағытталған.
