АҚШ пен Иран арасындағы шиеленістің жаңа кезеңге өтуінен кейін әлемдік мұнай бағасы күрт өсті, деп хабарлайды dalanews.kz.
Сауда-саттық барысында Brent маркалы мұнайдың бағасы 3,5%-дан астам өсіп, барреліне 78,35–79 долларға дейін жетті. Ал америкалық WTI мұнайының құны 73,62 долларға көтерілді.
Бағаның қымбаттауына АҚШ-тың Иранға жасаған жаңа әуе шабуылдары мен Тегеранның әлемдік мұнай жеткізудегі негізгі бағыттардың бірі саналатын Ормұз бұғазын ресми түрде жабуы басты себеп болған. Бұдан бөлек, АҚШ нысандары мен Таяу Шығыстағы америкалық одақтастарға жасалған шабуылдар да нарықтағы алаңдаушылықты күшейтті.
АҚШ Орталық қолбасшылығының (CENTCOM) мәліметінше, әскери операцияның мақсаты – Иранның Ормұз бұғазы маңында шабуыл жасау мүмкіндігін одан әрі әлсірету. Ал Иранның мемлекеттік ақпарат құралдары Сирик, Бендер-Аббас, Джаск қалаларында және Кешм аралында жарылыстар болғанын хабарлады.
Қазіргі шиеленіс Иранның контейнерлік кемеге шабуыл жасап, кейін Ормұз бұғазының жабылғанын жариялауынан кейін ушыққан. Бұған жауап ретінде АҚШ Иран аумағына бірнеше соққы жасаған. Кейін Иран аймақтағы АҚШ-тың одақтастарына шабуыл ұйымдастырған.
Мұнай бағасы айтарлықтай өскенімен, ол әзірге алдыңғы дағдарыстар кезінде тіркелген барреліне шамамен 120 долларлық ең жоғары деңгейден төмен қалып отыр.
Сарапшылардың пікірінше, егер АҚШ пен Иран арасындағы қақтығыс одан әрі өрши түссе, мұнай бағасы тағы да қымбаттап, әлемдік экономикаға түсетін қысым күшеюі мүмкін.
БҰҰ Бас хатшысы Антониу Гутерриш жағдайдың ушығуына байланысты терең алаңдаушылық білдіріп, АҚШ пен Иранды келіссөздерге дереу оралуға шақырды. Оның айтуынша, шиеленістің одан әрі күшеюі әлемдік экономика мен халықаралық қауіпсіздікке ауыр салдар әкелуі ықтимал.
