AQSh pen Iran arasyndaǵy shielenistiń jańa kezeńge ótýinen keiin álemdik munai baǵasy kúrt ósti, dep habarlaidy dalanews.kz.
Saýda-sattyq barysynda Brent markaly munaidyń baǵasy 3,5%-dan astam ósip, barreline 78,35–79 dollarǵa deiin jetti. Al amerikalyq WTI munaiynyń quny 73,62 dollarǵa kóterildi.
Baǵanyń qymbattaýyna AQSh-tyń Iranǵa jasaǵan jańa áýe shabýyldary men Tegerannyń álemdik munai jetkizýdegi negizgi baǵyttardyń biri sanalatyn Ormuz buǵazyn resmi túrde jabýy basty sebep bolǵan. Budan bólek, AQSh nysandary men Taiaý Shyǵystaǵy amerikalyq odaqtastarǵa jasalǵan shabýyldar da naryqtaǵy alańdaýshylyqty kúsheitti.
AQSh Ortalyq qolbasshylyǵynyń (CENTCOM) málimetinshe, áskeri operatsiianyń maqsaty – Irannyń Ormuz buǵazy mańynda shabýyl jasaý múmkindigin odan ári álsiretý. Al Irannyń memlekettik aqparat quraldary Sirik, Bender-Abbas, Djask qalalarynda jáne Keshm aralynda jarylystar bolǵanyn habarlady.
Qazirgi shielenis Irannyń konteinerlik kemege shabýyl jasap, keiin Ormuz buǵazynyń jabylǵanyn jariialaýynan keiin ýshyqqan. Buǵan jaýap retinde AQSh Iran aýmaǵyna birneshe soqqy jasaǵan. Keiin Iran aimaqtaǵy AQSh-tyń odaqtastaryna shabýyl uiymdastyrǵan.
Munai baǵasy aitarlyqtai óskenimen, ol ázirge aldyńǵy daǵdarystar kezinde tirkelgen barreline shamamen 120 dollarlyq eń joǵary deńgeiden tómen qalyp otyr.
Sarapshylardyń pikirinshe, eger AQSh pen Iran arasyndaǵy qaqtyǵys odan ári órshi tússe, munai baǵasy taǵy da qymbattap, álemdik ekonomikaǵa túsetin qysym kúsheiýi múmkin.
BUU Bas hatshysy Antoniý Gýterrish jaǵdaidyń ýshyǵýyna bailanysty tereń alańdaýshylyq bildirip, AQSh pen Irandy kelissózderge dereý oralýǵa shaqyrdy. Onyń aitýynsha, shielenistiń odan ári kúsheiýi álemdik ekonomika men halyqaralyq qaýipsizdikke aýyr saldar ákelýi yqtimal.
