Шығыс Қазақстан облысы мен Абай облысында әлеуметтік маңызы бар нысандарды салу кезінде 1,2 миллиард теңгеден астам қаражаттың жымқырылуына қатысты тергеу жүргізіліп жатыр, деп хабарлайды dalanews.kz.
Қаржылық мониторинг агенттігінің мәліметінше, іс бойынша «Восток Инжиниринг» ЖШС-нің басшысы күдікке ілінген. Компания 2020-2023 жылдар аралығында ШҚО мен Абай облысындағы жеті әлеуметтік нысанның құрылысына техникалық қадағалау жүргізген.
Әңгіме дене шынықтыру-сауықтыру кешендері, сумен жабдықтау жүйелері және жағалауды бекіту құрылыстары туралы болып отыр.
Тергеу дерегіне сәйкес, компания құрылыс жұмыстарының көлемін, сапасын және жобалық құжаттарға сәйкестігін бақылауға міндетті болған. Алайда іс жүзінде бұл міндеттер орындалмаған.
Соған қарамастан, серіктестік басшысы көрсетілген қызметтер үшін төлем алып, құрылыс көлемдері туралы жалған мәліметтер енгізілген орындалған жұмыстар актілеріне қол қойған.
Тінту барысында тергеушілер мөрлердің көшірмелерін және жалған актілерді анықтаған.
Алдын ала есеп бойынша мемлекетке келтірілген шығын көлемі 1,2 миллиард теңгеден асқан.
Күдіктіге іздеу жарияланып, сот оның қамауға алынуына санкция берді.
