Қазақстан қаржыгерлері қауымдастығының (ҚҚҚ) қаржы нарығының кәсіби қатысушылары арасында жүргізген кезекті сауалнамасына сәйкес, бір жылдан кейінгі инфляция деңгейі 9,7% болады деп болжанып отыр. Бұл өткен айдағы 10,4% болжамнан төмен, деп хабарлайды dalanews.kz.
Сауалнама нәтижесі бойынша, алдағы 12 айда базалық мөлшерлеме 14,5% деңгейінде болады деп күтіледі. Бұл оның біртіндеп төмендеу үрдісі жалғасуы мүмкін екенін көрсетеді.
Алайда сарапшылар ақша-несие саясатын жұмсартуға мүмкіндік әлі де шектеулі екенін айтады. Бұған инфляциялық күтулердің жоғары болуы, бюджеттік және квазимемлекеттік шығыстардың артуы, тарифтік реформалардың жалғасуы және сыртқы нарықтардағы баға өзгерістеріне байланысты тәуекелдер әсер етуі мүмкін.
Сонымен қатар сарапшылар теңге бағамына қатысты болжамдарын жақсартты. Қараша айының басында доллар бағамы 1 АҚШ доллары үшін 456,5 теңге болады деп күтілуде. Бір ай бұрын бұл көрсеткіш 474,2 теңге деңгейінде болжанған еді.
Ал бір жылдық кезеңге арналған болжам бойынша доллар бағамы 502,6 теңге болуы мүмкін. Бұған дейінгі болжам 511,6 теңге болған.
Сарапшылардың пікірінше, ұлттық валютаға сыртқы саудадағы оң айырма, Ұлттық банк пен экспорттаушылар тарапынан шетел валютасының ұсынысы, сондай-ақ 2027 жылы Ұлттық қордан бөлінетін трансферттердің 2,8 трлн теңгеден 4,4 трлн теңгеге дейін ұлғаюы қолдау көрсетуі ықтимал.
Сонымен бірге Brent маркалы мұнайдың бір жылдан кейінгі бағасына қатысты болжам төмендеді. Егер өткен айда сарапшылар мұнай бағасы барреліне 83,7 доллар болады деп күтсе, қазір бұл көрсеткіш 79 долларға дейін төмендеген.
Қазақстан экономикасының өсімі алдағы 12 айда 4,4% деңгейінде сақталады деген болжам өзгеріссіз қалды. Сарапшылар бұл көрсеткішке қаржылық жағдайлардың біртіндеп жақсаруы, бюджет шығыстарының артуы және ірі инвестициялық жобалардың іске асырылуы оң әсер етеді деп есептейді.
