Qazaqstan qarjygerleri qaýymdastyǵynyń (QQQ) qarjy naryǵynyń kásibi qatysýshylary arasynda júrgizgen kezekti saýalnamasyna sáikes, bir jyldan keiingi infliatsiia deńgeii 9,7% bolady dep boljanyp otyr. Bul ótken aidaǵy 10,4% boljamnan tómen, dep habarlaidy dalanews.kz.
Saýalnama nátijesi boiynsha, aldaǵy 12 aida bazalyq mólsherleme 14,5% deńgeiinde bolady dep kútiledi. Bul onyń birtindep tómendeý úrdisi jalǵasýy múmkin ekenin kórsetedi.
Alaida sarapshylar aqsha-nesie saiasatyn jumsartýǵa múmkindik áli de shekteýli ekenin aitady. Buǵan infliatsiialyq kútýlerdiń joǵary bolýy, biýdjettik jáne kvazimemlekettik shyǵystardyń artýy, tariftik reformalardyń jalǵasýy jáne syrtqy naryqtardaǵy baǵa ózgeristerine bailanysty táýekelder áser etýi múmkin.
Sonymen qatar sarapshylar teńge baǵamyna qatysty boljamdaryn jaqsartty. Qarasha aiynyń basynda dollar baǵamy 1 AQSh dollary úshin 456,5 teńge bolady dep kútilýde. Bir ai buryn bul kórsetkish 474,2 teńge deńgeiinde boljanǵan edi.
Al bir jyldyq kezeńge arnalǵan boljam boiynsha dollar baǵamy 502,6 teńge bolýy múmkin. Buǵan deiingi boljam 511,6 teńge bolǵan.
Sarapshylardyń pikirinshe, ulttyq valiýtaǵa syrtqy saýdadaǵy oń aiyrma, Ulttyq bank pen eksporttaýshylar tarapynan shetel valiýtasynyń usynysy, sondai-aq 2027 jyly Ulttyq qordan bólinetin transfertterdiń 2,8 trln teńgeden 4,4 trln teńgege deiin ulǵaiýy qoldaý kórsetýi yqtimal.
Sonymen birge Brent markaly munaidyń bir jyldan keiingi baǵasyna qatysty boljam tómendedi. Eger ótken aida sarapshylar munai baǵasy barreline 83,7 dollar bolady dep kútse, qazir bul kórsetkish 79 dollarǵa deiin tómendegen.
Qazaqstan ekonomikasynyń ósimi aldaǵy 12 aida 4,4% deńgeiinde saqtalady degen boljam ózgerissiz qaldy. Sarapshylar bul kórsetkishke qarjylyq jaǵdailardyń birtindep jaqsarýy, biýdjet shyǵystarynyń artýy jáne iri investitsiialyq jobalardyń iske asyrylýy oń áser etedi dep esepteidi.
