Қазақстанда азаматтарға атаулы әлеуметтік көмекті (ӘӘК) заңсыз тағайындауға қатысты 458-ге жуық іс тергеліп жатыр. Бұл туралы ҚР Еңбек және халықты әлеуметтік қорғау министрі Светлана Жақыпова мәлімдеді, деп хабарлайды Dalanews.kz.

“Қазіргі уақытта 458-ге жуық іс тергеуде. Бұл ретте біз учаскелік комиссия мүшелері тарапынан жасалған сөз байласу белгілерін анықтап отырмыз”, – деді министр Сенат жанындағы мәслихаттармен өзара іс-қимыл жөніндегі кеңестің кулуарында.

Уәкілетті органдар бұзушылықтарды геокодтау жүйесі арқылы анықтаған.

“Өтініште көрсетілген нақты мекенжай біреу болғанымен, тексеру мүлдем басқа жерде жүргізілген. Егер өтініште көрсетілген тұрғылықты мекенжайдың геокоды, жылжымайтын мүлік координаттары және тексеру жүргізілген орынның фотосуреттеріндегі геокодтар сәйкес келмесе, жүйе бұл төлемдерді тағайындауға жол бермейді”, – деп түсіндірді Жақыпова.

Сондай-ақ, министрлік әлеуметтік қызметтердің интеграцияланған моделі бойынша жаңа стандарт әзірлеген. Бұл модель барлық мемлекеттік органдардың біртұтас цифрлық платформада тікелей өзара іс-қимылын қамтамасыз етеді.

“Бұрын белгілі бір көмек көрсету үшін хат жазып, өтініш білдіру қажет болатын. Ал қазір бұл процесс бір ғана түймені басу арқылы жүзеге асады. Жүйе нақты отбасының қандай қызметке мұқтаж екенін және оған қай мемлекеттік қызметкер жауапты екенін автоматты түрде анықтайды”, – деп түсіндірді министр.

Бұл жоба алғаш рет Шымкент қаласында пилоттық режимде жүзеге асырылды. Жоспар бойынша, 1 мамырдан бастап жаңа жүйе еліміздің барлық өңірлерінде енгізілмек, деп атап өтті Жақыпова.