Qazaqstanda azamattarǵa ataýly áleýmettik kómekti (ÁÁK) zańsyz taǵaiyndaýǵa qatysty 458-ge jýyq is tergelip jatyr. Bul týraly QR Eńbek jáne halyqty áleýmettik qorǵaý ministri Svetlana Jaqypova málimdedi, dep habarlaidy Dalanews.kz.
“Qazirgi ýaqytta 458-ge jýyq is tergeýde. Bul rette biz ýchaskelik komissiia músheleri tarapynan jasalǵan sóz bailasý belgilerin anyqtap otyrmyz”, – dedi ministr Senat janyndaǵy máslihattarmen ózara is-qimyl jónindegi keńestiń kýlýarynda.
Ýákiletti organdar buzýshylyqtardy geokodtaý júiesi arqyly anyqtaǵan.
“Ótinishte kórsetilgen naqty mekenjai bireý bolǵanymen, tekserý múldem basqa jerde júrgizilgen. Eger ótinishte kórsetilgen turǵylyqty mekenjaidyń geokody, jyljymaityn múlik koordinattary jáne tekserý júrgizilgen orynnyń fotosýretterindegi geokodtar sáikes kelmese, júie bul tólemderdi taǵaiyndaýǵa jol bermeidi”, – dep túsindirdi Jaqypova.
Sondai-aq, ministrlik áleýmettik qyzmetterdiń integratsiialanǵan modeli boiynsha jańa standart ázirlegen. Bul model barlyq memlekettik organdardyń birtutas tsifrlyq platformada tikelei ózara is-qimylyn qamtamasyz etedi.
“Buryn belgili bir kómek kórsetý úshin hat jazyp, ótinish bildirý qajet bolatyn. Al qazir bul protsess bir ǵana túimeni basý arqyly júzege asady. Júie naqty otbasynyń qandai qyzmetke muqtaj ekenin jáne oǵan qai memlekettik qyzmetker jaýapty ekenin avtomatty túrde anyqtaidy”, – dep túsindirdi ministr.
Bul joba alǵash ret Shymkent qalasynda pilottyq rejimde júzege asyryldy. Jospar boiynsha, 1 mamyrdan bastap jańa júie elimizdiń barlyq óńirlerinde engizilmek, dep atap ótti Jaqypova.
