Павлодарда 62 жастағы ер адам 2012 жылы жасалған зейнеткер әйелдің өлімі үшін 20 жылға бас бостандығынан айырылды, деп хабарлайды dalanews.kz.
Сот мәліметінше, ер адам «Яблонька» бау-бақша серіктестігінде 72 жастағы әйелмен танысқан. Ол әйелдің саяжай үйінде ішімдік ішіп, кейін үй иесін зорлап, қылмысын жасыру үшін көрпемен тұншықтырып өлтірген.
Тергеу органдары 14 жыл бойы күдіктінің кім екенін анықтай алмаған. Алайда 2026 жылы қылмыс орнынан табылған ДНҚ ізі деректер базасындағы ер адамның мәліметтерімен сәйкес келген. Ұсталғаннан кейін ол өз кінәсін мойындады.
Осы уақытқа дейін павлодарлық азамат басқа бір адам өлтіргені үшін 11 жылдық жазасын өтеп жатқан. 2023 жылы ол 59 жастағы таныс әйелін де саяжай аумағында тұншықтырып өлтіргені үшін сотталған болатын.
Сот жазаларды ішінара қосып, оған 20 жыл колония жазасын тағайындады. Ал зорлау фактісі бойынша ер адамға бөлек жаза тағайындалмады, себебі бұл қылмыс бойынша талап қою мерзімі өтіп кеткен.
