АҚШ президенті Дональд Трамп Ресейге Украинадағы соғысты аяқтауға шақырды. Ол Украинамен бейбіт келісім жасалмаса, Ресейдің АҚШ пен басқа елдерге сататын барлық тауарларына баж салығы, салықтар және санкциялар енгізетінін мәлімдеді, деп хабарлайды Dalanews.kz.

Өзінің TruthSocial әлеуметтік желісіндегі жазбасында Дональд Трамп: «Мен Ресейге зиян келтіргім келмейді, орыс халқын жақсы көремін және әрдайым президент Путинмен өте жақсы қарым-қатынаста болдым», – деп жазды. Ол сондай-ақ: «Ресей [АҚШ-қа] Екінші дүниежүзілік соғыста жеңіске жетуге көмектесті, 60 миллион адамынан айырылды», – деп қосты.

«Осының бәрін ескере отырып, мен экономикасы құлдырап жатқан Ресейге және президент Путинге жақсылық жасағым келеді. Соғысты қазір тоқтатыңыз және бұл ақымақ қақтығысты аяқтаңыз! Жағдай тек қиындай береді», – деп жазды АҚШ президенті.

Трамп, егер Ресей мен Украина «жақын арада» келісімге келмесе, оның «басқа амалы қалмайтынын» және Ресейдің АҚШ пен басқа елдерге экспорттайтын барлық тауарларына салықты көтеріп, баж салығы мен санкциялар енгізетінін айтты.