Қазақстанда мұғалімдерді міндетіне жатпайтын жұмысқа жегу әлі тыйылмай тұр. Тамыз айында оқу-ағарту министрі Ғани Бейсембаев облыс және қала әкімдерін жинап, педагогтарды қосымша жұмысқа тартудың заңсыз екенін тікелей түсіндірмек, деп хабарлайды Dalanews.kz.

Министрдің айтуынша, мұғалімдерді жағажай күзетуге шығарып, көшеде кезекшілікке қою – ашық заң бұзушылық. Осыған байланысты министрлік шенеуніктерді жеке-жеке жинап, арнайы түсіндіру жұмысын жүргізуге мәжбүр болып отыр.

«Заң бойынша мұғалімдерге міндетіне жатпайтын шаруаларды артуға қатаң тыйым салынған. Біз осы мәселені бірнеше мәрте айтып та, ескертіп те жүрміз. Бірақ, өкінішке қарай, кейбір қала мен аудан әкімдері бұл талапты елемейді. Жүйелі түрде болмаса да, мұндай жайттар жиі қайталануда. Сондықтан тамыз айында барлық деңгейдегі әкімдерді жинап, арнайы жиын өткіземіз. Оларға тікелей заң нормаларын түсіндіріп, қажет болса заңның көшірмесін қолдарына ұстатамыз. Бәлкім, сонда түсінікті болар», – деді министр Бейсембаев.

Министрдің бұлай ашынуы тегін емес. Жақында ғана Қостанай қаласының әкімі Марат Жүндібаев мұғалімдерді өзен-көлдің жағалауына кезекшілікке қойған еді. Министрліктің дер кезінде араласуы арқасында мұғалімдер бұл жұмыстан босатылған.

«Мен Қостанай әкімімен тікелей сөйлескен жоқпын, бірақ орынбасарым бірден хабарласып, жағдайды түсіндірді. Бұл мәселеге Еңбек министрлігі мен Төтенше жағдайлар министрлігі де араласуға мәжбүр болды. Осыдан кейін әкім қажетті қорытынды шығарар деген үміттемін», – дейді министр.

Министрлік педагогтардың құқығын қорғауға алдағы уақытта да қатаң қарайтынын ескертті.