Марат Омаров жаңа қызметке тағайындалды

Қаракөз Амантай 20 жел. 2024 16:17 3182

Марат Омаров Қазақстан футбол федерациясының президенті болып сайланды. Бұл туралы Қазақстан футбол федерациясының баспасөз қызметі мәлім етті, деп хабарлайды Dalanews.kz.

20 желтоқсанда ҚФФ-ның кезектен тыс XXVII сайлау конференциясы өтті, бұл жиында федерацияның жаңа басшысы анықталды.

ҚФФ президенттігіне бірнеше адам үміткер болды. Олар: 

Даумов Алтай Алмасұлы – «Алматы облысының футбол қауымдастығы» ЗТБ атынан; Қайыров Ербол Қыдырбекұлы – «Ақмола облыстық футбол қауымдастығы» ЗТБ атынан; Омаров Марат Талғатұлы – «Астана қаласы футбол федерациясы қауымдастығы» ЗТБ атынан.

Ал бұған дейін ҚФФ президенттігіне өтінім берген Мағау Наргис Ерланқызы, Жамантаев Ерлан Айтпайұлы және Лория Давид Григорьевич сайлауға қатысудан өз еркімен бас тартты.

Кезектен тыс XXVII конференциясының нәтижесі бойынша «Астана қаласы футбол федерациясы қауымдастығы» ЗТБ атынан сайлауға түскен Омаров Марат Талғатұлы 34 дауыспен алға шығып, Қазақстан футбол федерациясының президенті атанды.


Ұсынылған
Соңғы жаңалықтар