ҚР Еңбек және халықты әлеуметтік қорғау министрлігінің "Ашық НҚА" порталында зиянды еңбек жағдайына ие жұмыстарға тағы бес жаңа кәсіпті жатқызуды ұсынған бұйрық жобасы жарияланды, деп хабарлайды Dalanews.kz.
Зиянды еңбек жағдайына ие жұмыстарға жатқызу ұсынылған жаңа кәсіптер қатарында мыналар бар:
- әк, әктас және доломит қоймаларында жұмыс істейтін, әк, әктас және доломитті әк-күйдіру пештерінің шығыс бункерлеріне, сондай-ақ конвертер цехының беру трактінің шығыс бункерлеріне тасымалдау үшін көпір крандарының әрекет ету аймағына қабылдаумен, орналастырумен және берумен айналысатын бульдозер машинисі,
- прокат стандарының эмульсиясын дайындау аппаратшысы,
- табақ металлды буып-түю агрегаты постының операторы,
- қара металлургия өндірісі кезінде газ конденсатын айдаумен, ағызумен және тасымалдаумен айналысатын автомобиль жүргізушісі,
- электр станцияларының ленталық конвейерлерінің қабылдау бункеріне қатарларды түсіру, тиеу, қалыптастыру, төсеу және көмір беру жөніндегі жұмыстарда тікелей айналысатын бульдозер машинисі.
Егер бұл құжат қабылданса, онда осы лауазымдарда жұмыс істейтін азаматтар үшін жұмыс берушілер МЗЖ және ЖМЗЖ-дан бөлек, жалақының 5% мөлшерінде, бірақ өз есебінен міндетті кәсіптік зейнетақы жарналарын төлей бастайды.
Бұйрық жобасы 2025 жылдың 2 қыркүйегіне дейін қоғамдық талқыға ұсынылған.
