Бұл туралы Азаттық радиосы хабарлайды.
Оларға жеке меншік күзет фирмасы қызметкерінің құзыретін арнайы құралдар мен қару қолдана отырып асыра пайдаланды деген айып тағылған. Павлодар қаласы № 2 қылмыстық соты үкімімен Сейітқанов сот залынан тұтқынға алынды. Комлев 2016 жылдың қазан айынан бері қамауда отырған еді.
40 жастағы Святослав Комлев пен 29 жастағы Ернар Сейітқанов Павлодардағы кафе қонақтарын ұру оқиғасынан кейін сотталып отыр. Қазан айының басында әлеуметтік желіде кафеде қонақтарды ұрған видео тараған еді. Онда күзетшілер автомат дүмімен бірнеше ер адамды кафе ішінде соққыға жығады, боқтайды.
Сотталушылар соңғы сөздерінде жәбірленушілерден кешірім сұрап, соттан бас бостандықтарынан айырмауды өтінді. Святослав Комлевтің асырауында кәмелет жасқа толмаған балалары бар. Ернар Сейітқановтың анасы — бірінші топ мүгедегі.
Мұның алдында сот шешімімен күзет фирмасының тағы екі қызметкері — 37 жастағы Руслан Әбдірахманов пен 31 жастағы Азат Ахметов қылмыстық жауапкершіліктен босатылған еді. Ақпараттарға қарағанда, оларды жауапкершіліктен босату туралы жәбірленушілердің бірі өтініш түсірген. Өтініш иесі Павлодар облысының Ертіс ауданының 41 жастағы тұрғыны. Сот-медициналық сараптама қорытындысында оның бас сүйек және ми жарақатын алғаны, бетінің және төсінің іскені, омыртқасына зақым келгені жазылған. Бұл жарақаттарды сот жеңіл деп тапқан.
