Bul týraly Azattyq radiosy habarlaidy.
Olarǵa jeke menshik kúzet firmasy qyzmetkeriniń quzyretin arnaiy quraldar men qarý qoldana otyryp asyra paidalandy degen aiyp taǵylǵan. Pavlodar qalasy № 2 qylmystyq soty úkimimen Seiitqanov sot zalynan tutqynǵa alyndy. Komlev 2016 jyldyń qazan aiynan beri qamaýda otyrǵan edi.
40 jastaǵy Sviatoslav Komlev pen 29 jastaǵy Ernar Seiitqanov Pavlodardaǵy kafe qonaqtaryn urý oqiǵasynan keiin sottalyp otyr. Qazan aiynyń basynda áleýmettik jelide kafede qonaqtardy urǵan video taraǵan edi. Onda kúzetshiler avtomat dúmimen birneshe er adamdy kafe ishinde soqqyǵa jyǵady, boqtaidy.
Sottalýshylar sońǵy sózderinde jábirlenýshilerden keshirim surap, sottan bas bostandyqtarynan aiyrmaýdy ótindi. Sviatoslav Komlevtiń asyraýynda kámelet jasqa tolmaǵan balalary bar. Ernar Seiitqanovtyń anasy — birinshi top múgedegi.
Munyń aldynda sot sheshimimen kúzet firmasynyń taǵy eki qyzmetkeri — 37 jastaǵy Rýslan Ábdirahmanov pen 31 jastaǵy Azat Ahmetov qylmystyq jaýapkershilikten bosatylǵan edi. Aqparattarǵa qaraǵanda, olardy jaýapkershilikten bosatý týraly jábirlenýshilerdiń biri ótinish túsirgen. Ótinish iesi Pavlodar oblysynyń Ertis aýdanynyń 41 jastaǵy turǵyny. Sot-meditsinalyq saraptama qorytyndysynda onyń bas súiek jáne mi jaraqatyn alǵany, betiniń jáne tósiniń iskeni, omyrtqasyna zaqym kelgeni jazylǵan. Bul jaraqattardy sot jeńil dep tapqan.
