«ەلەكور كۋزەت» كۇزەت فيرماسىنىڭ ەكى قىزمەتكەرى سۆياتوسلاۆ كومليەۆ پەن ەرنار سەيىتقانوۆتىڭ ءارقايسىسى ءتورت جارىم جىلعا سوتتالدى. ۇكىمدە ەكەۋىنىڭ جازالارىن جالپى رەجيمدەگى تۇزەتۋ مەكەمەسىندە وتەيتىنى ايتىلعان.

بۇل تۋرالى ازاتتىق راديوسى حابارلايدى.

ولارعا جەكە مەنشىك كۇزەت فيرماسى قىزمەتكەرىنىڭ قۇزىرەتىن ارنايى قۇرالدار مەن قارۋ قولدانا وتىرىپ اسىرا پايدالاندى دەگەن ايىپ تاعىلعان. پاۆلودار قالاسى № 2 قىلمىستىق سوتى ۇكىمىمەن سەيىتقانوۆ سوت زالىنان تۇتقىنعا الىندى. كومليەۆ 2016 جىلدىڭ قازان ايىنان بەرى قاماۋدا وتىرعان ەدى.

40 جاستاعى سۆياتوسلاۆ كومليەۆ پەن 29 جاستاعى ەرنار سەيىتقانوۆ پاۆلودارداعى كافە قوناقتارىن ۇرۋ وقيعاسىنان كەيىن سوتتالىپ وتىر. قازان ايىنىڭ باسىندا الەۋمەتتىك جەلىدە كافەدە قوناقتاردى ۇرعان ۆيدەو تاراعان ەدى. وندا كۇزەتشىلەر اۆتومات دۇمىمەن بىرنەشە ەر ادامدى كافە ىشىندە سوققىعا جىعادى، بوقتايدى.

سوتتالۋشىلار سوڭعى سوزدەرىندە جابىرلەنۋشىلەردەن كەشىرىم سۇراپ، سوتتان باس بوستاندىقتارىنان ايىرماۋدى ءوتىندى. سۆياتوسلاۆ كومليەۆتىڭ اسىراۋىندا كامەلەت جاسقا تولماعان بالالارى بار. ەرنار سەيىتقانوۆتىڭ اناسى — ءبىرىنشى توپ مۇگەدەگى.

مۇنىڭ الدىندا سوت شەشىمىمەن كۇزەت فيرماسىنىڭ تاعى ەكى قىزمەتكەرى — 37 جاستاعى رۋسلان ءابدىراحمانوۆ پەن 31 جاستاعى ازات احمەتوۆ قىلمىستىق جاۋاپكەرشىلىكتەن بوساتىلعان ەدى. اقپاراتتارعا قاراعاندا، ولاردى جاۋاپكەرشىلىكتەن بوساتۋ تۋرالى جابىرلەنۋشىلەردىڭ ءبىرى ءوتىنىش تۇسىرگەن. ءوتىنىش يەسى پاۆلودار وبلىسىنىڭ ەرتىس اۋدانىنىڭ 41 جاستاعى تۇرعىنى. سوت-مەديسينالىق ساراپتاما قورىتىندىسىندا ونىڭ باس سۇيەك جانە مي جاراقاتىن العانى، بەتىنىڭ جانە ءتوسىنىڭ ىسكەنى، ومىرتقاسىنا زاقىم كەلگەنى جازىلعان. بۇل جاراقاتتاردى سوت جەڭىل دەپ تاپقان.