Жетісу облысында еңбек нарығының сұранысын ескере отырып, жергілікті бюджет есебінен 100 білім гранты бөлінді. Бұл гранттар негізінен педагогикалық, медициналық, ауыл шаруашылығы, инженерлік және құрылыс мамандықтарына арналған,- деп хабарлайды Dalanews.kz
Облыстық білім басқармасының мәліметіне қарағанда, грант иегерлерін облыстық комиссия ҰБТ-дан жинаған балдарына сәйкес анықтады.
«Білім беру гранттары еліміздің 9 жоғары оқу орнына - І.Жансүгіров атындағы Жетісу университетіне, С.Ж. Асфендияров атындағы Қазақ ұлттық медицина университетіне, Қазақ ұлттық аграрлық университетіне, Қазақ ұлттық қыздар педагогикалық университетіне, Абай атындағы Қазақ ұлттық педагогикалық университетіне, Алматы технологиялық университетіне, Т.Жүргенов атындағы қазақ өнер академиясына, Семей медицина университетіне, Халықаралық білім беру корпорациясына берілді. Мамандықтар бөлінісі бойынша педагогикалық – 31, медициналық – 33, өнер – 4, өсімдік шаруашылығы – 9, ауыл шаруашылығы – 6, инженерлік – 5, құрылыс – 2, туризм – 3, қоршаған орта – 3, ақпараттық технологиялар 4 грант берілді. Бүгінгі таңда грант иегерлеріне арнайы сертификаттар табысталып, оларды жоғары оқу орындарына орналастыру жұмыстары жүргізілуде», - делінген облыстық білім басқармасының хабарламасында.
Жетісу облысы әкімінің білім беру грантына ие болған түлектердің бірі Панфилов ауданы Жаркент қаласындағы Еңбекші орта мектебінің түлегі Аружан Бекболат:
– ҰБТ-дан 93 балл жинадым, бірақ мемлекеттік грантқа іліге алмадым. Дегенмен арманым орындалды. Облыс әкімінің грантының арқасында С. Асфендияров атындағы медициналық университетте оқуға мүмкіндік алдым. Армандаған мамандығыма оқуға түскеніме өте қуаныштымын. Болашақта жоғары білікті маман болып, өңірге қызмет етуге бар күшімді саламын, – дейді Аружан.
Қаратал ауданы Үштөбе қаласындағы № 51 мектеп-гимназияның түлегі Диляра Нұржан да осындай пікір білдірді. Ол «Агрономия» мамандығы бойынша Талдықорған қаласындағы италиялық Марке политехникалық университетінің филиалына оқуға түскен:
– Мен көпбалалы отбасынан шықтым, грантқа түсіп оқысам деп қатты армандадым. Облыс бюджеті есебінен бөлінген гранттың арқасында арманым орындалды. Ауыл шаруашылығы бағыты бойынша шетелдік жоғары оқу орнының филиалында білім алатыныма қуаныштымын. Бұл – мен үшін үлкен мүмкіндік. Биылғы түлектердің өз жолын тауып, армандарына жетулеріне тілектеспін, – деді Диляра.
Атап өтсек, жергілікті бюджет есебінен білім алған әрбір студентпен үшжақты келісімшарт жасалады. Бұл келісімге сәйкес түлек оқуын аяқтаған соң кемінде үш жыл өз мамандығы бойынша өңірде жұмыс істеуі тиіс. Мұндай талап өңірдегі маман тапшылығы мәселесін шешу мақсатында енгізіліп отыр.
