جەتىسۋ وبلىسىندا ەڭبەك نارىعىنىڭ سۇرانىسىن ەسكەرە وتىرىپ، جەرگىلىكتى بيۋدجەت ەسەبىنەن 100 ءبىلىم گرانتى ءبولىندى. بۇل گرانتتار نەگىزىنەن پەداگوگيكالىق، مەديسينالىق، اۋىل شارۋاشىلىعى، ينجەنەرلىك جانە قۇرىلىس ماماندىقتارىنا ارنالعان،- دەپ حابارلايدى Dalanews.kz
وبلىستىق ءبىلىم باسقارماسىنىڭ مالىمەتىنە قاراعاندا، گرانت يەگەرلەرىن وبلىستىق كوميسسيا ۇبت-دان جيناعان بالدارىنا سايكەس انىقتادى.
«ءبىلىم بەرۋ گرانتتارى ەلىمىزدىڭ 9 جوعارى وقۋ ورنىنا - ءى.جانسۇگىروۆ اتىنداعى جەتىسۋ ۋنيۆەرسيتەتىنە، س.ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنە، قازاق ۇلتتىق اگرارلىق ۋنيۆەرسيتەتىنە، قازاق ۇلتتىق قىزدار پەداگوگيكالىق ۋنيۆەرسيتەتىنە، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە، الماتى تەحنولوگيالىق ۋنيۆەرسيتەتىنە، ت.جۇرگەنوۆ اتىنداعى قازاق ونەر اكادەمياسىنا، سەمەي مەديسينا ۋنيۆەرسيتەتىنە، حالىقارالىق ءبىلىم بەرۋ كورپوراسياسىنا بەرىلدى. ماماندىقتار ءبولىنىسى بويىنشا پەداگوگيكالىق – 31، مەديسينالىق – 33، ونەر – 4، وسىمدىك شارۋاشىلىعى – 9، اۋىل شارۋاشىلىعى – 6، ينجەنەرلىك – 5، قۇرىلىس – 2، تۋريزم – 3، قورشاعان ورتا – 3، اقپاراتتىق تەحنولوگيالار 4 گرانت بەرىلدى. بۇگىنگى تاڭدا گرانت يەگەرلەرىنە ارنايى سەرتيفيكاتتار تابىستالىپ، ولاردى جوعارى وقۋ ورىندارىنا ورنالاستىرۋ جۇمىستارى جۇرگىزىلۋدە»، - دەلىنگەن وبلىستىق ءبىلىم باسقارماسىنىڭ حابارلاماسىندا.
جەتىسۋ وبلىسى اكىمىنىڭ ءبىلىم بەرۋ گرانتىنا يە بولعان تۇلەكتەردىڭ ءبىرى پانفيلوۆ اۋدانى جاركەنت قالاسىنداعى ەڭبەكشى ورتا مەكتەبىنىڭ تۇلەگى ارۋجان بەكبولات:
– ۇبت-دان 93 بالل جينادىم، ءبىراق مەملەكەتتىك گرانتقا ىلىگە المادىم. دەگەنمەن ارمانىم ورىندالدى. وبلىس اكىمىنىڭ گرانتىنىڭ ارقاسىندا س. اسفەندياروۆ اتىنداعى مەديسينالىق ۋنيۆەرسيتەتتە وقۋعا مۇمكىندىك الدىم. ارمانداعان ماماندىعىما وقۋعا تۇسكەنىمە وتە قۋانىشتىمىن. بولاشاقتا جوعارى بىلىكتى مامان بولىپ، وڭىرگە قىزمەت ەتۋگە بار كۇشىمدى سالامىن، – دەيدى ارۋجان.
قاراتال اۋدانى ۇشتوبە قالاسىنداعى № 51 مەكتەپ-گيمنازيانىڭ تۇلەگى ديليارا نۇرجان دا وسىنداي پىكىر ءبىلدىردى. ول «اگرونوميا» ماماندىعى بويىنشا تالدىقورعان قالاسىنداعى يتاليالىق ماركە پوليتەحنيكالىق ۋنيۆەرسيتەتىنىڭ فيليالىنا وقۋعا تۇسكەن:
– مەن كوپبالالى وتباسىنان شىقتىم، گرانتقا ءتۇسىپ وقىسام دەپ قاتتى ارماندادىم. وبلىس بيۋدجەتى ەسەبىنەن بولىنگەن گرانتتىڭ ارقاسىندا ارمانىم ورىندالدى. اۋىل شارۋاشىلىعى باعىتى بويىنشا شەتەلدىك جوعارى وقۋ ورنىنىڭ فيليالىندا ءبىلىم الاتىنىما قۋانىشتىمىن. بۇل – مەن ءۇشىن ۇلكەن مۇمكىندىك. بيىلعى تۇلەكتەردىڭ ءوز جولىن تاۋىپ، ارماندارىنا جەتۋلەرىنە تىلەكتەسپىن، – دەدى ديليارا.
اتاپ وتسەك، جەرگىلىكتى بيۋدجەت ەسەبىنەن ءبىلىم العان ءاربىر ستۋدەنتپەن ءۇشجاقتى كەلىسىمشارت جاسالادى. بۇل كەلىسىمگە سايكەس تۇلەك وقۋىن اياقتاعان سوڭ كەمىندە ءۇش جىل ءوز ماماندىعى بويىنشا وڭىردە جۇمىس ىستەۋى ءتيىس. مۇنداي تالاپ وڭىردەگى مامان تاپشىلىعى ماسەلەسىن شەشۋ ماقساتىندا ەنگىزىلىپ وتىر.
