Қазақстандағы жаңа кен орындарының басым бөлігі енді мемлекеттің меншігінде болады. Бұл туралы Мәжілістің жалпы отырысында палата спикері Ерлан Қошанов мәлімдеді, деп хабарлайды Dalanews.kz.

“Соңғы жылдары қабылданған барлық заңның негізінде Президенттің әділеттілік қағидаты жатыр. Конституцияға табиғи ресурстар халыққа тиесілі деген норманы нақтылап енгіздік. Бұл қағидат бүгінде “Ұлттық қор – балаларға” бағдарламасы арқылы іске асырылуда. Сондай-ақ жаңадан ашылған ірі кен орындарының 50%-дан астамы мемлекетке тиесілі болады”, – деді ол.

Мәжіліс төрағасы елден заңсыз шығарылған активтерді қайтару мәселесіне де тоқталды.

“Президенттің тікелей бастамасымен заңсыз алынған активтерді қайтару туралы заң қабылданды. Соның нәтижесінде Қазақстанға екі триллион теңгеге жуық қаражат қайтарылды. Бұл – Мемлекет басшысының реформаларының нақты жемісі әрі тарихи әділеттілікті қалпына келтіруге бағытталған маңызды қадамдар”, – деп атап өтті Ерлан Қошанов.

Айта кетейік, бүгін мәжіліс төрағасы Ерлан Қошанов бүгін "президенттің саяси реформаларын іске асыру – мемлекеттік құрылыстың жаңа тарихи кезеңі" тақырыбында баяндама жасады.