Мәжіліс депутаты өңірге барып, тау етегінде тұратын елмен тілдесіпті.
"Ел аман, жұрт тынышта, "тау-тасты қйыон-қоншына тығып, меншіктеп алыпты" дегенді естідіңіздер ме?! Ендеше айтайын. Үшқоңыр деген таудың барын бәріңіз білесіздер. Талайлардың кіндік қаны тамып, тірлігіне арқау болған сол тау бүгінде сай-сала, қырат-жоталарымен түгел бір азаматтардың ғана меншігінде.
Алматы облысындағы Үшқоңыр үстіртіне барар жолды басынан-аяғына дейін мұздай қаруаланған топ күзетеді. Жол жоқ емес бар. Бірақ жабық", - деді Мақсат Толықбай.
Оның сөзінше, Үшқоңыр тауы заң бойынша Іле Алатауы паркіне қарайды. Алайда "ДүниеАгро" ЖШС-не 2004 жылы "Үшқоңыр" үстіртінде орналасқан жүздеген гектар жерге меншік құқығы заңсыз берілген. Өйткені заң талаптары бойынша (23-бап, 50-бап, 8 және 43-бап) арнайы мақсаттағы жерлерді заңды тұлғалардың жекешелеп алуына құқығы жоқ екен. Тіпті оны бөлуге де болмайды.
Депутат осы маңда тұратын халық малын жая алмай, пұшайман күйде отырғанын айтты.
"Қыратқа кіреберістен 8 шақырым қашықта орналасқан Резиденцияның аумағы ғана қоршалып, шлагбаум қойылса тағы бір сәрі... Ал, жан баласын жуытпай, тауды айналдыра қоршап тастау - барып тұрған бассыздық", - дейді Мақсат Толықбай.
Сурет: Сәуле Бикитееваның желідегі парақшасынан
