Иран мен АҚШ Швейцарияда өткен келіссөздер барысында бірқатар маңызды мәселелер бойынша уағдаластыққа қол жеткізді. Бұл туралы Иранның сыртқы істер министрі Аббас Арагчи мәлімдеді, деп хабарлайды dalanews.kz.
Оның айтуынша, келіссөздер нәтижесінде Иранның мұнай экспортын қайта жандандыруға мүмкіндік беретін келісім жасалған. Сонымен қатар тараптар Иранның бұғатталған активтерінің бір бөлігін босату және елді қалпына келтіру мен дамыту жоспарын іске қосу туралы да ортақ шешімге келген.
Әзірге АҚШ билігі бұл ақпаратқа қатысты ресми пікір білдірген жоқ. Алайда келіссөздерге делдал болған Пәкістан мен Катар бірлескен мәлімдеме жариялап, саммит барысында алдағы келіссөздер үшін «үміт сыйлайтын ілгерілеуге» қол жеткізілгенін хабарлады.
Тараптар бірнеше жұмыс тобын құруға келіскен. Олар Иранның ядролық бағдарламасына, санкцияларға және бұған дейін жасалған меморандумның орындалуына қатысты мәселелерді қарастырады. Бұдан бөлек, АҚШ пен Иран арасында түпкілікті келісімге қол жеткізуге арналған жол картасы да мақұлданған.
Сондай-ақ қарсы тараптар келісімге қатысушылар мен делдалдардың қатысуымен шиеленісті төмендету тетігін құру жөнінде келісімге келген. Бұл механизм аймақтағы жағдайдың одан әрі ушығуына жол бермеуге бағытталмақ.
