Талғардағы атышулы қылмыстық іс бойынша сот процесінде айыпталушы Азамат Тоқтаубаев "Қамажай" дүкені алдындағы жағдайды егжей-тегжейлі баяндады. Айтуынша, оқиға болған түні ол ешкімге қол көтермеген, деп хабарлайды Dalanews.kz.

Сотта прокурор Дана Сәрсенбай:

— Дүкеннің алдында сіздер келген кезде марқұм Шерзат Болаттың достары тұрды. Сол нақты келген үш бала өз тарапынан сіздерге соққы көрсетті ме? — деп сұрады.

Азамат Тоқтаубаев:

— Шерзаттың достары бізге қарсы келгенін білген жоқпын. Олар текетіреске келген секілді тұрды. Бірақ мен оларды басында Дархан Әскентайдың достары-інілері деп ойладым.

Прокурор:

— Солай ойласаңыздар, неге Махмұтты соқтыңыздар?

— Мен ешкімді ұрып-соққан жоқпын.

— Сол жерде сіз Шерзат Болат Нұрқиясты ұрды деп айттыңыз. Сол сәтте Шерзатқа кім соққы жасады?

— Ешкім жасаған жоқ.

— Онда Шерзат Болат неге келесі көшеге қарай қашты?

— Қашқанын байқамадым.

— Сіз ол сәтте қайда болдыңыз?

— "Қамажай" дүкенінің алдында болдым.

— Топтағы адамдар Шерзат Болаттың артынан не үшін кетті?

— Ол кезде мен Қаржаубай мырзамен сөйлесіп тұрдым. Олардың іс-әрекетін байқамадым. Видеоны қарасаңыздар, мен келген мерседес көлігіне қарай қашып кетемін.

— Сіз өзіңіз Шерзат Болат пен Нұрқанат Ғайыпбаевқа соққы жасадыңыз ба? Дүкеннің алдында немесе басқа жақта?

— Жоқ, мен ешкімге соққы жасамадым. Ол жерде азаматтарға күш қолданбадым, саусағымның ұшын да тигізбедім.

— Сіз көліктің жанына барып тұрдым дедіңіз. Соның айналысынан басқа адамдарды көрдіңіз бе?

— Көрген жоқпын. Себебі мен өзіме оқ тиіп кетпеді ме екен деп аяғымды шешіп, киімімді қарап тұрдым. Құлағым естімей қалды.

— Сіздермен бірге келген екі қыз сол кезде қайда болды?

— Байқамадым.

— Сол жерде Шерзат Болаттың анасын көрдіңіз бе?

— Жоқ, мен ол кезде кімнің анасы, кімнің әкесі екенін білмедім.