Түркияның басшысы Режеп Тайып Ердоған Орталық Азия деген терминнің орнына Түркістан терминін қолданбақ, - деп хабарлайды Dalanews.kz. 

Сарапшылардың сөзінше, Ердоған осылайша Азияны өз қолына алмақ. 

"Егер кімде-кім Ердоған Азияны басқарғысы келетініне күмәні болса, міне, мына жаңалықтан кейін бәрі белгілі болған секілді: Түркияның Білім министрлігі мектептегі тарих бағдарламасына өзгеріс енгізбек. Енді "Орталық Азия" терминінің орнына "Түркістан" деген термин қолданылмақ. Ердоған: "Біз "Түркия ғасыры" туралы көзқарасымызды түркі мемлекеттерін ұйымдастыруға кеңейте отырып, алдағы кезеңді түркі дәуіріне айналдыру үшін етене бірге боламыз" деп мәлімдеді", - дейді "Ахметов" телеграм арнасындағылар. 

Ал түркиялық сарапшылардың сөзінше, бұл шешім "болашақ ұрпақ арасында ұлттық сана мен патриотизмді нығайтуға бағытталған". 

"Түркістан" терминінің тарихи маңыздылығын түрік профессорлары да қолдаған. Профессор Ахмет Ташағыл терминнің тарихи маңыздылығын түсіндірді. Оның айтуынша, "түріктердің отаны" дегенді білдіретін бұл сөз тарихтың алғашқы кезеңдерінен бері қолданылып келеді.

Сарапшы түркі әлемі үшін ортақ тарих, география, әдебиет, карталар мен әліпби жасау жөніндегі белсенді қадамдар кезеңінде ұлттық білім министрлігінің "Түркістан" терминін оқулықтарға, оның ішінде балаларға енгізу туралы шешімі елеулі өзгеріс болмақ. Оның пікірінше, бұл трансформация тек Түркия үшін ғана емес, бүкіл түркі әлемі үшін, сондай - ақ түркі мемлекеттерінің әріптес елдері үшін маңызды бастама және құнды үлес.