Қазақстан Республикасының Көлік министрлігінің баспасөз қызметі Бакуден Ақтауға келген ұшақта ақау пайда болғанын жеткізді, деп хабарлайды Dalanews.kz.
"Ақтау әуежайында аэродромдық және жерүсті қызметтері ұшу-қону жолағынан әуе кемесін сүйреп әкету жұмыстарын жүргізді. Ұшақ штаттық режимде қонған. Алайда қонғаннан кейін әуе кемесінің мұрындық тірегішінде (Баку – Ақтау бағыты) ақау пайда болған", – деп хабарлады министрлік дүйсенбі күні KazTAG редакциясына.
Айта кету керек, ұшақта жолаушылар болмаған.
"Әуежай ашық, штаттық режимде жұмыс істеп тұр", – деп қосты ведомство.
Еске салайық, 25 желтоқсанда жергілікті уақыт бойынша 11.30-да Ақтау маңында Бакуден Грозныйға ұшып бара жатқан ұшақ апатқа ұшырады. Бұл — Azerbaijan Airlines әуекомпаниясына тиесілі Эмбраер 190 ұшағы.
Ақпарат бойынша ұшақ бортында 67 адам, оның ішінде 5 экипаж мүшесі болған. Жолаушылар рейсі қатты тұманға байланысты Грозныйға қона алмаған, алдымен Махачкалаға, содан кейін Ақтауға бағытталған.
Апаттан 6 қазақстандық көз жұмды. Жалпы қаза тапқандар саны — 38. 29 адам аман қалды.
