Ұжымдық қауіпсіздік туралы шарт ұйымына (ҰҚШҰ) мүше елдер Арменияны дауыс беру құқығынан айыру туралы шешім қабылдаған. Бұл туралы Ресей президентінің баспасөз хатшысы Дмитрий Песков мәлімдеді, деп хабарлайды dalanews.kz.
«Армения бірнеше жыл бойы өз міндеттемелерін орындамағандықтан, оны дауыс беру құқығынан айыру, сондай-ақ ҰҚШҰ-дағы жауапты қызметтерге өз өкілдерін тағайындау құқығын шектеу туралы шешім қабылданды», – деді Кремль өкілі.
Ұйымның бас хатшысы Таалатбек Масадыков Армения мүшелік жарналар бойынша берешегін өтеген жағдайда өз құқықтарын қайтара алатынын түсіндірді.
Мәліметке сәйкес, Ереван 2024 жылдан бері ұйымға мүшелік жарна аудармаған. ҰҚШҰ жарғысының 25-бабына сәйкес, егер ұйым бюджеті алдындағы берешек екі жылдан асып кетсе, мемлекет дауыс беру құқығынан айырылады. Алайда Армения ұжымдық қауіпсіздік кепілдігінен айырылмайды.
Бұған дейін, тамыз айында Армения премьер-министрі Никол Пашинян егер ел ҰҚШҰ құрамынан шығарылса, «өте риза болатынын» мәлімдеген еді.
Оның айтуынша, Армения ұйымға өздерін қызықтырған барлық сұрақты қойғанымен, нақты жауап ала алмаған. Сондай-ақ Пашинян алдағы бес жылда Ереван ҰҚШҰ жұмысына қайта оралуды немесе ұйымдағы қатысуын жандандыруды жоспарлап отырмағанын айтқан.
