Ақтөбе облысы Полиция департаменті жанармай құю бекетінде көлік өртенген оқиғаға қатысты қылмыстық іс қозғады, деп хабарлайды dalanews.kz.
Полицияның мәліметінше, оқиға салдарынан үш адам қаза тапқан: әйел адам және кәмелетке толмаған екі бала. Сондай-ақ, бір ер адам күйік жарақатымен медициналық мекемеге жеткізілді.
"Бұл дерекке қатысты Қылмыстық кодекстің 281-бабы ("Жарылыс қаупі бар объектілерде қауіпсіздік қағидаларын бұзу") бойынша қылмыстық іс тіркелді. АГҚС (автогаз құю станциясы) иесі ұсталып, уақытша ұстау изоляторына қамалды. Тергеу барысы Полиция департаменті басшылығының ерекше бақылауында", - деп жазылған хабарламада.
Еске салайық, бұған дейін Бөгенбай батыр көшесінде орналасқан газ құю бекетінде көлік өртеніп, салдарынан үш адам көз жұмғаны хабарланды.
