Алтын 2025 жылы ең табысты қорғаныс активі ретіндегі орнын нығайтты. Жыл басында бір трой унциясының бағасы шамамен 2,8 мың АҚШ доллары болса, кейін 5 мың доллардан асты. Нарықтағы мұндай серпінге геосаяси шиеленіс, АҚШ-та пайыз мөлшерлемесі төмендеуі және Қытай мен Үндістан тарапынан жоғары сұраныс әсер етті, деп хабарлайды Dalanews.kz finprom.kz дерегіне сілтеп.
World Gold Council дерегінше, 2025 жылы алтынды ең көп сатып алған ел – Польша (102 тонна). Одан кейін Қазақстан (57 тонна) мен Әзербайжан (53,4 тонна) тұр. Бразилия мен Түркия да алғашқы бестікке енді.
Сонымен қатар, 2022-2024 жылдары Қазақстан 118,3 тонна алтын сатқан. Алайда 2025 жылы бағыт өзгеріп, ел қайтадан қор жинауға көшті. Кейінгі алты жылда алтынды ең көп сатып алған мемлекет - Қытай (358 тонна).
Қазір әлемдік орталық банктер қорында 36,5 мың тоннадан аса алтын бар. Қор көлемі бойынша АҚШ көш бастап тұр: 8,1 мың тонна. Қазақстан 341 тоннамен әлемде 16-орында.
