Қазақстанда алаяқтар азаматтардың ЖСН-ін пайдаланып, олардың атына заңсыз SIM-карталар рәсімдеуі мүмкін. Кейін мұндай нөмірлер арқылы несие рәсімдеу, жалған аккаунттар ашу немесе банк пен құқық қорғау органдарының атынан қоңырау шалу сияқты заңсыз әрекеттер жасалуы ықтимал, деп хабарлайды dalanews.kz.
Көп жағдайда азаматтар өз атына тіркелген бөгде нөмірлер туралы кездейсоқ біледі. Әдетте бұл алаяқтық әрекеттер жасалғаннан кейін ғана анықталады.
Сарапшылардың айтуынша, Қазақстанда SIM-карта сатып алу кезінде міндетті биометриялық сәйкестендіру енгізілгенімен, бұл мәселе толық шешілген жоқ. Қаскөйлер ескі қорғалмаған дерекқорларды пайдаланады, адамдарды «деректерді жаңарту» деген сылтаумен қашықтан верификациядан өткізуге көндіреді немесе жалған тұлғаларды (дроптарды) тартады.
Өзіңіздің атыңызға қандай нөмірлер тіркелгенін тексеру үшін бірнеше минут жеткілікті.
Алдымен eGov Mobile мобильді қосымшасын ашып, ЭЦҚ немесе SMS-код арқылы жүйеге кіріңіз.
Одан кейін басты беттегі «Мемлекеттік қызметтер» бөліміне өтіп, «Танымал қызметтерді» таңдаңыз.
Содан соң «Абоненттік нөмірдің IMEI кодын тексеру» қызметін ашыңыз. Бұл сервис арқылы ЖСН немесе IMEI нөмірі бойынша өз атыңызға тіркелген байланыс нөмірлерін тексеруге болады.
Егер тексеру барысында өзіңізге тиесілі емес нөмір анықталса, ұялы байланыс операторының ресми байланыс орталығына дереу хабарласып, нөмірді бұғаттауды және келісімшартты тоқтатуды талап еткен жөн. Сондай-ақ құқық қорғау органдарына арыз жазу ұсынылады.
