Qazaqstanda alaiaqtar azamattardyń JSN-in paidalanyp, olardyń atyna zańsyz SIM-kartalar rásimdeýi múmkin. Keiin mundai nómirler arqyly nesie rásimdeý, jalǵan akkaýnttar ashý nemese bank pen quqyq qorǵaý organdarynyń atynan qońyraý shalý siiaqty zańsyz áreketter jasalýy yqtimal, dep habarlaidy dalanews.kz.
Kóp jaǵdaida azamattar óz atyna tirkelgen bógde nómirler týraly kezdeisoq biledi. Ádette bul alaiaqtyq áreketter jasalǵannan keiin ǵana anyqtalady.
Sarapshylardyń aitýynsha, Qazaqstanda SIM-karta satyp alý kezinde mindetti biometriialyq sáikestendirý engizilgenimen, bul másele tolyq sheshilgen joq. Qaskóiler eski qorǵalmaǵan derekqorlardy paidalanady, adamdardy «derekterdi jańartý» degen syltaýmen qashyqtan verifikatsiiadan ótkizýge kóndiredi nemese jalǵan tulǵalardy (droptardy) tartady.
Ózińizdiń atyńyzǵa qandai nómirler tirkelgenin tekserý úshin birneshe minýt jetkilikti.
Aldymen eGov Mobile mobildi qosymshasyn ashyp, ETsQ nemese SMS-kod arqyly júiege kirińiz.
Odan keiin basty bettegi «Memlekettik qyzmetter» bólimine ótip, «Tanymal qyzmetterdi» tańdańyz.
Sodan soń «Abonenttik nómirdiń IMEI kodyn tekserý» qyzmetin ashyńyz. Bul servis arqyly JSN nemese IMEI nómiri boiynsha óz atyńyzǵa tirkelgen bailanys nómirlerin tekserýge bolady.
Eger tekserý barysynda ózińizge tiesili emes nómir anyqtalsa, uialy bailanys operatorynyń resmi bailanys ortalyǵyna dereý habarlasyp, nómirdi buǵattaýdy jáne kelisimshartty toqtatýdy talap etken jón. Sondai-aq quqyq qorǵaý organdaryna aryz jazý usynylady.
