Оразаның ең ерекше құдіреті – ол адамды тек рухани жағынан тазалап қоймай, өмірлік әдеттерді түбірімен өзгертіп жіберуге керемет мүмкіндік береді. Ғалымдар дәлелдегендей, жаңа әдетті бекіту үшін шамамен 21-30 күн қажет екен. Ал оразаның 30 күні осыған таптырмас уақыт.
Әр күніңізді жаңа бір әдетпен толықтырсаңыз, бір айдан соң мүлде басқа адам болып шығуыңыз әбден мүмкін. Бұл жерде мәселе тек үлкен мақсаттар емес, қарапайым, бірақ өмір сапасын арттыратын әдеттер туралы болмақ.
Мысалы, бірінші күні таңғы уақытыңызды 5 минуттық жаттығумен бастаңыз. Келесі күні кешкісін кітап оқуға 15 минут арнауды әдетке айналдырыңыз. Үшінші күні бір стақан суды көбірек ішуге тырысыңыз. Төртінші күні телефоныңыздағы қажетсіз қолданбаларды өшіріңіз. Бесінші күні күніне бір жаңа ағылшын сөзін үйреніңіз. Осылай әр күн сайын бір ғана әдетті енгізе беріңіз.
Қызығы, ағзаңыз ораза кезінде ерекше күйде болады: миыңыз жаңа әдеттерге бейімделгіш, есте сақтау қабілетіңіз жоғары, көңіл күйіңіз де тұрақты. Себебі аштық пен шектеудің арқасында адамның ішкі тәртібі күшейеді. Психологтар мұны self-discipline дейді, яғни өз-өзіңді басқару, ішкі тәртіп. Дәл осы күй әдетті қалыптастыру үшін аса маңызды.
Отыз күнде енгізген отыз әдетіңізді кішкене есептеп көрейік. Айдың аяғында сіз:
– 150 минут жаттығу жасайсыз (күніне 5 мин);
– 450 бет кітап оқисыз (күніне 15 беттен);
– 60 стакан артық су ішесіз (күніне 2 стаканнан);
– 30 жаңа сөз үйренесіз (күніне бір сөзден);
– 15 сағат телефоныңызда аз отырасыз (күніне жарты сағат қысқартсаңыз).
Бұл – қарапайым ғана есеп. Ал осыдан кейін сіздің өміріңіз қалай өзгеретінін елестетіп көріңізші. Бір айдың ішінде өзіңізге деген сеніміңіз артып, ерік-жігеріңіз нығайып, санаңыз реттеледі.
Ораза – өміріңізді түбегейлі өзгерту үшін берілген ғажайып мүмкіндік. Осы 30 күнді жіберіп алмаңыз. Себебі жақсы өмір – жақсы әдеттердің жиынтығы ғана. Ендеше, бүгіннен бастаңыз!
