Салық жөніндегі кеңесші Дмитрий Казанцев жалпыға бірдей белгіленген салық режимін қолданатын кәсіпкерлердің 2026 жылға арналған салық төлеу мерзімі 2027 жылғы наурыз-сәуірге сәйкес келетінін еске салды, деп хабарлайды dalanews.kz.
Оның айтуынша, сол уақытқа қарай кейбір кәсіпорындар банкротқа ұшырауы мүмкін. Дмитрий Казанцевтің сөзінше, қазір кәсіпкерлерге, әсіресе, шағын бизнес өкілдеріне оңай емес. Жұмыс істеп тұрған кәсіпорындардың өзінде табыс айтарлықтай азайған.
"Мысалы, менің негізгі бизнесім кеңес беру және жарнама саласымен байланысты. Жаңа Салық кодексіне сәйкес биылдан бастап бұрынғы 3 пайыздың орнына 26 пайыз салық төлеуім керек. Бірақ қызмет бағасын да 26 пайызға көтере алмадым. Өйткені жылдар бойы бірге жұмыс істеп келе жатқан клиенттер бар. Оларға "Кешіріңіздер, енді осылай болады" деп айта алмаймын. Соның салдарынан табысым азайды. Сатылымнан пайыз алатын менеджерлерімнің де табысы төмендеді. Демек, олар да аз сатып ала бастады. Мұндай жағдай әр бизнесте болып жатыр", – деді Казанцев Ulysmedia-ға.
