الماتى وبلىسى تالعار اۋدانىندا بولعان كىسى ءولىمى، زورلاۋ جانە بالا ۇرلاۋ دەرەگى بويىنشا تىڭ اقپارات شىقتى. قايعىلى وقيعانىڭ الدىن الۋعا ءتيىس بولعان ۋچاسكەلىك پوليسيا ينسپەكتورى قىزمەتىنەن قۋىلىپ، قىلمىستىق جاۋاپكەرشىلىككە تارتىلۋدا، دەپ حابارلايدى Dalanews.kz

Tengrinews.kz مالىمەتىنشە، الماتى وبلىستىق پروكۋراتۋراسى بۇرىنعى پوليسيا قىزمەتكەرىنە قاتىستى تەرگەۋدى اياقتاعان.

پوليسەيدىڭ قانداي كىناسى بار؟

رەسمي مالىمەت بويىنشا، تالعار اۋداندىق پوليسيا باسقارماسىنىڭ ۋچاسكەلىك ينسپەكتورىنا قاتىستى قىلمىستىق كودەكستىڭ ەكى بىردەي بابى بويىنشا ءىس قوزعالدى:

1. 371-باپ، 2-بولىك: «اۋىر زارداپتارعا اكەپ سوققان سالعىرتتىق».

2. 369-باپ، 2-1-بولىك: «قۇقىق قورعاۋ ورگانى قىزمەتكەرىنىڭ قىزمەتتىك جالعاندىق جاساۋى».

ينسپەكتور وقيعادان ەكى اي وتكەن سوڭ، ياعني 2025 جىلدىڭ 4 قاراشاسىندا عانا ىشكى ىستەر ورگاندارىنان بوساتىلعان.

زارداپ شەككەن تاراپتىڭ ادۆوكاتى نە دەيدى؟

زارداپ شەككەن وتباسىنىڭ ادۆوكاتى جاندوس پالمانوۆتىڭ ايتۋىنشا، قايعىلى وقيعادان ءۇش كۇن بۇرىن (3 قىركۇيەكتە) ۋچاسكەلىك ينسپەكتور جابىرلەنۋشىنىڭ ۇيىنە بارعان. ءدال سول كۇنى ايەلدىڭ ۇيىنە قارۋ ۇستاعان ەر ادام كەلگەن بولاتىن.

ادۆوكاتتىڭ ايتۋىنشا، پوليسەي قورعاۋ نۇسقاماسىن (زاششيتنوە پرەدپيسانيە) تولتىرىپ، ءبىراق وعان جابىرلەنۋشىنىڭ قولىن ءوزى قويىپ جىبەرگەن.

«ساراپتاما قولتاڭبانىڭ جابىرلەنۋشىگە تيەسىلى ەمەس ەكەنىن انىقتادى»، – دەيدى پالمانوۆ.

ەگەر پوليسەي سول كەزدە ءتيىستى شارا قولدانعاندا، 6 قىركۇيەكتەگى تراگەديانىڭ الدىن الۋعا بولار ما ەدى دەگەن سۇراق تۋىندايدى.

قاندى وقيعانىڭ حرونولوگياسى

بۇل وقيعا تالعار ماڭىنداعى قىزىلقايرات اۋىلىندا بولدى.

• باستاۋى: وقيعادان ءبىر اي بۇرىن جابىرلەنۋشى ايەل زورلاۋ دەرەگى بويىنشا پوليسياعا ارىزدانعان. الايدا كۇدىكتى ۇستالماعان. كەيىن وتباسى كۇدىكتىنى وزدەرى ۇستاپ پوليسياعا تاپسىرعانىمەن، ونى قايتا بوساتىپ جىبەرگەن.

• شارىقتاۋ شەگى: 6 قىركۇيەك كۇنى كۇدىكتى ەكى سىبايلاسىمەن كەلىپ، ايەلدىڭ 27 جاستاعى ءىنىسىن اتىپ ولتىرگەن. مارقۇمنىڭ ارتىندا جۇكتى ايەلى مەن ءۇش بالاسى قالدى.

• بالانى ۇرلاۋ: قىلمىسكەرلەر ايەلدىڭ ەكى جاسار قىزىن كەپىلگە الىپ قاشقان. پوليسيا قۋعىنى كەزىندە كۇدىكتى بالامەن بىرگە كولىكتى جاردان قۇلاتقان. ءسابي جاراقات الىپ، وتا جاسالدى.

باستى كۇدىكتىگە تاعىلعان ايىپتار

ءىس بويىنشا نەگىزگى فيگۋرانت – ازامات ە.-گە قاتىستى تەرگەۋ ءجۇرىپ جاتىر. وعان قىلمىستىق كودەكستىڭ 11 بابى بويىنشا ايىپ تاعىلدى، ونىڭ ىشىندە:

• كىسى ءولتىرۋ (توپ بولىپ)؛

• ادام ۇرلاۋ (كامەلەتكە تولماعان بالانى)؛

• زورلاۋ جانە سەكسۋالدىق سيپاتتاعى زورلىق-زومبىلىق؛

• الاياقتىق، زاڭسىز باس بوستاندىعىنان ايىرۋ؛

• قارۋدى زاڭسىز دايىنداۋ جانە ساقتاۋ؛

• ولتىرەمىن دەپ قورقىتۋ جانە ت.ب.

سونداي-اق، قىلمىسقا قاتىسى بار دەگەن كۇدىكپەن ەكى كامەلەتكە تولماعان ءجاسوسپىرىم دە كىسى ءولتىرۋ جانە ادام ۇرلاۋ باپتارى بويىنشا جاۋاپقا تارتىلۋدا.