وبلىس اكىمىنىڭ ءبىرىنشى ورىنباسارى ءلاززات تۇرلاشيەۆ فورۋمنىڭ تالدىقورعان قالاسىندا العاش رەت ۇيىمداستىرىلىپ وتىرعانىن اتاپ ءوتىپ، وبلىستىڭ تۋريستىك تارتىمدىلىعى، تاماشا تابيعاتى جايىنا قىسقاشا توقتالىپ ءوتتى.
– بۇگىنگى شارا ەلىمىزدىڭ، سونىڭ ىشىندە وبلىسىمىزدىڭ تۋريستىك الەۋەتىن ارتتىرۋعا، ينفراقۇرىلىمىن دامىتۋعا ءوزىنىڭ زور ىقپالىن تيگىزەدى دەپ ويلايمىن. مەملەكەت باسشىسى جاقىندا جاريالانعان جولداۋىندا سىرتتان كەلەتىن جانە ىشكى ءتۋريزمدى دامىتۋعا ەرەكشە كوڭىل ءبولۋدى جانە سالالىق مەملەكەتتىك باعدارلاما قابىلداۋدى تاپسىرعان بولاتىن. وسى رەتتە مەملەكەتتىك باعدارلاما جوباسىنا الاكول كولىنىڭ جاعالاۋى، ىلە الاتاۋىنىڭ تاۋ كلاستەرى، شارىن شاتقالى سياقتى وبلىستىڭ ءىرى تۋريستىك رەكرەاسيالىق اۋماقتارىن دامىتۋ باعىتىنداعى ۇسىنىستار ەنگىزىلىپ، جوسپارلارى ازىرلەنىپ جاتىر، – دەپ اتاپ ءوتتى. ءسوزىن قورىتىندىلاي كەلە، وسى فورۋم قىزىقتى كەزدەسۋ، مازمۇندى پىكىر الماسۋ تۇرىندە ءوربىپ، پەرسپەكتيۆالى يدەيالار مەن باستامالاردىڭ تۋىنداۋىنا ىقپال ەتەتىن ايتۋلى شارا بولاتىندىعىنا سەنىم ءبىلدىردى.
مۇنان سوڭ جۇڭگو حالىق رەسپۋبليكاسى مادەنيەت جانە تۋريزم مينيسترلىگىنىڭ ورتا ازياداعى وكىلى ۆان شۋلين اتالمىش شاراعا شاقىرعان ۇيىمداستىرۋشىلارعا ريزاشىلىعىن ءبىلدىرىپ، قازاقستان-قىتاي اراسىنداعى مادەني-تۋريستىك بايلانىستاردى نىعايتۋ جايىنا توقتالدى.
ءوز كەزەگىندە قازاقستان تۋريستىك قاۋىمداستىعىنىڭ اتقارۋشى ديرەكتورى، قازاقستاندىق قوناقۇيلەر مەن مەيرامحانالار قاۋىمداستىعىنىڭ پرەزيدەنتى راشيدا شايكەنوۆا وتاندىق ءتۋريزمنىڭ الدىندا تۇرعان بىرنەشە ماسەلەنى اتاپ بەردى. «حالىقارالىق تۋريزم نارىعىندا باسەكەگە قابىلەتتى بولۋ ءۇشىن ءبىز ەڭ الدىمەن، بۇل سالادا باي تاريحىمىزدى، ياعني ۇلى تۇرىك وركەنيەتىن، مادەنيەتىمىز بەن سالتىمىزدى پاش ەتە ءبىلۋىمىز كەرەك»، – دەدى ر.شايكەنوۆا. سونىمەن قاتار بىلىكتى كادرلار دايارلاۋ، تۋريستىك نىسانداردى سيفرلاندىرۋعا جەتە ءمان بەرۋدى دە الدىڭعى قاتارداعى ماسەلەلەرگە جاتقىزدى. ونىڭ ايتۋىنشا، بۇگىنگى كۇنى وتاندىق تۋريستىك نىسانداردىڭ تەك 17% عانا ءوز قىزمەتتەرىن جارنامالاۋ مەن ساتۋ كانالى رەتىندە ينتەرنەت پەن الەۋمەتتىك جەلىنى پايدالانىپ وتىر. ياعني سيفرلاندىرۋعا كىرىسۋ ءتۋريزمدى دامىتۋدىڭ نەگىزگى باعىتتارىنىڭ ءبىرى بولۋى ءتيىس.
فورۋمنىڭ پلەنارلىق وتىرىسىنان كەيىن شارا پانەلدىك سەسسيالارمەن جالعاسۋدا. وندا تۋريستىك ۇيىمدار مەن سالا ماماندارى «تۋريستىك ونىمدەردى ىلگەرىلەتۋ قۇرالدارى»، «تۋريستىك ءونىمدى سيفرلاندىرۋ: كوممۋنيكاسيالار» تاقىرىپتارىن تالقىلاپ جاتىر.
سونداي-اق فورۋم اياسىندا ەرتەڭ، 20 قازاندا تالدىقورعانداعى «جاستار» سپورت سارايىندا قازاقستان حالىقتارى ۇلتتىق اسحانالارىنىڭ «توي قازان» VI فەستيۆالى ۇيىمداستىرىلادى. وعان قوسا Zhetysu Travel ورتالىعىنىڭ اشىلۋ سالتاناتى وتەدى.
جالپى، الماتى وبلىسىنا كەلەتىن تۋريستەر لەگى جىل سايىن 20-30% وسۋدە. بيىلعى جىلى جەتىسۋ وڭىرىنە تابان تىرەيتىن تۋريستەر سانى 2 ميلليونعا جەتەدى دەپ كۇتىلىپ وتىر. بۇل – وتكەن جىلمەن سالىستىرعاندا 31،3% ءوسىم بولادى دەگەن ءسوز. 2018 جىلدىڭ قورىتىندىسى بويىنشا كورسەتىلگەن تۋريستىك قىزمەت 10،0 ملرد تەڭگە شاماسىندا بولماق. سوڭعى ءۇش جىلدا تۋريستىك ينفراقۇرىلىمدى دامىتۋعا 15،7 ملرد تەڭگە مەملەكەتتىك ينۆەستيسيا باعىتتالعان. سونىمەن قاتار جالپى قۇنى 15،6 ملرد تەڭگە جەكە ينۆەستيسياعا سالىنعان 102 تۋريستەردى ورنالاستىرۋ نىسانى پايدالانۋعا بەرىلگەن.
