زايسان اۋدانىنداعى قايعىلى وقيعا ورنىنا ءوڭىر باسشىسى ەرمەك كوشەربايەۆ كەلىپ، بارلىق جۇمىلدىرىلعان قىزمەتتەردىڭ باسشىلارىمەن جەدەل كەڭەس وتكىزدى. بۇل تۋرالى شقو اكىمىنىڭ باسپا ءسوز قىزمەتى حابارلاپ وتىر.

وقيعانىڭ سەبەپتەرى مۇقيات تەكسەرىلەتىن بولادى، دەپ حابارلايدى Altaynews.kz.

ەستەرىڭىزگە سالا كەتسەك، كەشە زايسان قالاسىندا قوعامدىق مونشانىڭ جىلىتۋ قازاندىعى جارىلىپ، ءبىر ادام قازا تاپتى. الدىن الا مالىمەتتەر بويىنشا، بۇل سول مونشانىڭ قوجايىنى. زارداپ شەككەن تاعى ەكى ادام بار.

شقو تجد مالىمەتتەرىنە سۇيەنسەك، جىلىتۋ قازاندىعى جەكە عيماراتتا ورنالاسقان، مونشانىڭ وزىنە زاقىم كەلمەگەن.

قۇتقارۋشىلار قازا تاپقان ادامنىڭ دەنەسىن الىپ شىقتى، زارداپ شەككەن تاعى ەكى ادام اۋرۋحاناعا جەتكىزىلدى.

بۇگىن وبەكتىدە ينجەنەرلىك زەرتحانانىڭ انىقتاۋشىلارى مەن قىزمەتكەرلەرىنىڭ جۇمىسى باستالادى. ونىڭ ناتيجەلەرى ارى قاراي تەرگەۋ جۇرگىزۋ ءۇشىن قۇقىققورعاۋ ورگاندارىنا بەرىلەدى.

ايماق بيلىگى بۇل جاعدايدى دەرەۋ باقىلاۋعا الدى. بارلىق قىزمەتتەر جۇمىلدىرىلدى. www.altaynews.kz  سايتىنا  اقپارات كوزى رەتىندە سىلتەمە جاساۋىڭىزدى سۇرايمىز.