2025 جىلعى 24 ناۋرىزدان باستاپ ابونەنتتىك ۇيالى بايلانىس قۇرىلعىلارىن تىركەۋ ەرەجەلەرىنە ەنگىزىلگەن وزگەرىستەر كۇشىنە ەنەدى. وعان سايكەس، زاڭسىز جولمەن تابىلىپ، ساتىلعان سمارتفونداردىڭ وشىرەلىتىنى تۋرالى ايتىلادى. الايدا بۇعان دەيىن ساتىلىپ، قولدا جۇرگەندەرگە ونىڭ ەش قاتىسى جوق. تەك 24 ناۋرىزدان كەيىنگىسىلەرى عانا. جالپى، بۇل جاڭاشىلدىق نەنى بىلدىرەدى؟ Dalanews.kz بۇل رەتتە ەكونوميست ولجاس ءبايدىلدينوۆتىڭ جەلىدەگى جازباسىن سول قالپىندا بەرە كەتۋدى ءجون كورىپ وتىر.
"بالكىم، ەستىگەن بولارسىزدار، قازاقستاندا زاڭسىز جولمەن كەلگەن سمارتفونداردىڭ وشىرىلەتىنىن. 24 ناۋرىزدان باستاپ سونداي بۇيرىق كۇشىنە ەنەدى. مۇنداي جاعدايدا بيۋدجەتكە قانشا شىعىن كەلەتىنى دە ەسەپتەلىپ ۇلگەرىپتى: شامامەن 150 ملرد تەڭگە (300 ملن دوللار) دەيدى. تيىسىنشە، قازاقستاندىقتار بۇل سومانى ءوز قالتاسىنان تولەۋگە مىندەتتى بولادى! قالاي دەيسىزدەر مە؟.. ازىرگە، بۇل جاڭاشىلدىقتى تۇپكىلىكتى دەڭگەيدە ۇعىپ جاتقانىم جوق. ءبىراق، مىسال كەلتىرە كەتەيىن. ماسەلەن، مەن شەتەلدەن نەمەسە حالىق/كاسپيي ونلاين ارقىلى (كوپ ەل سولاي الادى عوي) iPhone ساتىپ الدىم دەيىن، ونى قوسۋ كەزىندە IMEIء-ىن تىركەتەمىن، بولدى، مەن ەشكىمگە ەشنارسە قارىز ەمەسپىن عوي دەيسىز؟ الايدا، سمارتفوندار قۇنى قىمباتتايتىنى انىق. ايتپاقشى، بۇل دا تۇرىك سەنارييى بولىپ تابىلادى. ماسەلەن، تۇركيادا "باج، ققس، ۋتيلالىم" سالىقتارىن تولەۋسىز سىرتتان سمارتفون الىپ كەلسەڭىز، ەلدە ءۇش اي جۇرگەننەن كەيىن ءالى تەلەفونىڭىز اۆتوماتتى تۇردە ءوشىپ قالادى. ياعني، ونى Wi-Fi ارقىلى عانا پايدالانا الاسىز، ءبىراق ەشكىممەن سويلەسە المايسىز. ال باج سالىعى دەگەن وتەەەەە قىمبات. تۇركيادا جاڭا iPhone 16 Pro Max ءۇشىن ۇستىنەن شامامەن 1300 دوللار تولەۋىڭىز كەرەك! ياعني، ماسەلەن، قازاقستاننان تۇركياعا ءوزىڭىزدىڭ iPhone 16 Pro Max-پەن بارىپ، ءومىر ءسۇرىپ جاتىرسىز دەلىك، ءۇش ايدان كەيىن ونى ءوشىرىپ تاستايدى، ال ونى وشىرمەسىن دەسەڭىز، ۋداي قىمبات باج سالىعىن تولەۋىڭىز كەرەك بولادى. دەمەك، سول سەكىلدى نارسە بىزدە دە پايدا بولادى. تاعى دا ايتايىن، مەنىڭ ايتقانىم ايداي كەلىپ جاتىر: ءبىزدىڭ ەكونوميكا تۇرىك سەناريىمەن العا جىلجۋدا"، دەپ جازادى مامان ءوزىنىڭ Telegram ارناسىندا.
بۇعان دەيىن سايتىمىزدا "ناۋرىزدان باستاپ كەيبىر سمارتفوندار "قارا تىزىمگە" ەنىپ، ىستەمەي قالادى" دەگەن ماتەريال جاريالانعان. بۇل رەتتە رەسمي تىركەلگەن قۇرىلعىلاردىڭ يەلەرىنە قوسىمشا ارەكەت جاساپ قاجەت ەمەستىگى ەسكەرتىلەدى. مينيسترلىك جاڭا ەرەجەلەردى ەنگىزۋ بويىنشا اقپاراتتىق جۇمىستاردى ودان ءارى جالعاستىرادى.
