بەلگىلى زاڭگەر ادىلەتحان مولداحان رۋدنىيداعى كوشەلەر اتاۋىن قازاقشالاۋعا قاتىستى تىڭدالىم كەزىندە رەگلامەنتتى بۇزىپ، ارتىنشا الەۋمەتتىك جەلىدە قازاقتاردى "شوشقالار" دەپ قورلاۋ سوزدەرىن ايتقان ەكاتەرينا كورچاگيناعا قاتىستى پىكىر ءبىلدىردى، دەپ حابارلايدى Dalanews.kz.

ادىلەتحان مولداحاننىڭ سوزىنشە، بۇل جاعدايدا ۇلتارالىق الاۋىزدىق بويىنشا ءىس قوزعاۋعا بولادى. 

"ارىز جازامىز. باسقا ۇلت وكىلدەرىنە ايتارىم: قازاقستاندا تۇرۋ ۇناماي ما، رەگلامەنت، زاڭناماسى ۇناماي ما - باسقا ەلگە كوشىڭىزدەر. بۇل ۇلتارالىق الاۋىزدىقتىڭ مادەنيە ءتۇرى. "رەگلامەنتتەرىڭىزگە تۇكىرگەنىم بار" دەپ تۇر. ءقازىر كەڭەس ۇكىمەتى جوق"، - دەيدى زاڭگەر. 

ول قىلمىستىق كودەكستىڭ 174-بابى بويىنشا ۇلتارالىق الاۋىزدىق قوزدىرعانى ءۇشىن ارىز جازاتىنىن ايتتى. 

ەسكە سالايىق، 21 قاراشا كۇنى رۋدنىي قالاسىندا كوشە اتاۋلارىن وزگەرتۋگە ارنالعان تاريحي قوعامدىق تىڭداۋ ءوتتى.

تىڭدالىمدا قالاداعى يۆان فرانكو كوشەسىن - ءاليا مولداعۇلوۆا، ال 50 لەت وكتيابريا كوشەسىن - دوستىق دەپ وزگەرتۋ ماسەلەسى قارالدى. رۋدنىي قالاسىنىڭ بەلسەندىسى ءارى جەرگىلىكتى اۆتومەكتەپتىڭ ديرەكتورى ەكاتەرينا كورچاگينا تىڭداۋ كەزىندەگى سوزىمەن قىزۋ تالقىعا ءتۇستى. 

بۇعان دەيىن ساياساتتانۋشى دانيار اشىمبايەۆ بۇل ماسەلەگە قاتىستى تالداۋ جاساعان بولاتىن.