ءبىراق بارىنەن دە ماڭىزدىسى – قاڭتار وقيعاسىنا قاتىستى شەشىم بولدى.
قاڭتار ايىنان باستاپ كوميسسيا قۇرىلعالى بەرى قۇرامىندا زاڭگەرلەر مەن ادۆوكاتتار جۇمىس ىستەپ كەلەدى. ءبىز ءبىر ەمەس، بىرنەشە مارتە راقىمشىلىق قولدانۋدى ماسەلە ەتىپ كوتەردىك. ميتينگ دەپ شىعىپ، ارتىنان جاپپاي تارتىپسىزدىككە ۇلاسقان الاڭدا جۇرگەن جاستارمەن، 600-گە جۋىق ازاماتپەن تەرگەۋ يزولياتورى جاعدايىندا جەكە سويلەستىك. ولارعا ءبىر عانا: «سەن ءوزىڭ جەكە ازامات رەتىندە وسى الاڭعا نە ءۇشىن شىقتىڭ؟» دەگەن سۇراق قويىلدى. سوندا باسىم بولىگى «ادىلەتسىزدىك» دەپ جاۋاپ بەردى.
ياعني قىمباتشىلىق تا، باسقا دا ەمەس. ءوزى ادىلەتسىزدىككە تاپ بولماسا دا، دوسى، تۋىسى، تانىسىنان قوعامداعى ادىلەتسىزدىكتەردى ەستيدى. سوندىقتان قۇقىق، زاڭدىلىقتىڭ ساقتالۋ ماسەلەسى ءبىرىنشى كەزەكتە تۇرۋ كەرەك. قالعانىنىڭ ءبارى، ءتىپتى ەكونوميكالىق ماسەلە ەكىنشى كەزەكتە تۇرۋعا ءتيىس.
بىر-ەكى زاتتىڭ قىمباتتاعانىنا حالىق الاڭعا شىقپايدى.
جاستارى 25–35 جاس ارالىعىنداعى 99،9 پايىزى بۇرىن سوتتالماعان. ەشقانداي قىلمىستىق قۇقىقبۇزۋشىلىق جاساماعان، تەرگەۋ ورىندارىندا بولماعان. اياق استىنان 2022 جىلدىڭ 4 قاڭتارىندا ءبارى جاپپاي قىلمىسكەرگە اينالىپ كەتە مە سوندا؟ مۇمكىن ەمەس. وسىنى دالەلدەگىمىز كەلىپ جۇرگەنىنە ءبىراز ۋاقىت بولدى. سوندىقتان راقىمشىلىق جاريالانۋ كەرەك.
ءتىپتى، قولىنا قارۋ ۇستاپ تۇرعانداردىڭ كەيبىرى ول قارۋدى نە ءۇشىن ۇستاعانىن ءوزى بىلمەيدى. قارۋدى العانىمەن، اتۋ، ساتۋ ماقساتى جوق ازاماتتار بولدى. مىنە، وسى ازاماتتارعا اراشا سۇراپ جۇرگەنىمىزگە ءبىراز بولدى. وسىدان 1 اي بۇرىن پرەزيدەنتتىڭ اتىنا تەك قانا وسى راقىمشىلىق جاريالاۋ تۋرالى ۇسىنىس جولدادىق. سوندا مەيلىنشە ساراپتاما جاساپ شىقتىق.
پرەزيدەنت جولداۋىندا راقىمشىلىق بەرۋ تۋرالى شەشىم قابىلداعانىنا مەن وتە قاتتى قۋانىشتىمىن. جىل باسىنان باستاپ قىركۇيەككە دەيىن 9 ايعا جۋىق تەك قانا وسى شارۋامەن اينالىستىق. باسقا ىستەرگە مويىن بۇرۋعا مۇرشا بولىپ جاتقان جوق. سوندىقتان بۇل – ۇلكەن جەڭىس دەپ ەسەپتەيمىز جانە بۇل ءۇشىن پرەزيدەنتكە العىستان باسقا ايتارىمىز جوق.
تاريحي ءسات دەۋگە بولادى. جۇمىستىڭ ناتيجەسى. ءبىزدىڭ جۇمىسىمىزعا نازار اۋدارىپ، ەستىپ، وسى شەشىمدى قابىلدادى.
